من تجرأ من قطف هالياسمين

البارت الثامن


ياسمين : طلقني
بدر : نعم ؟
ياسمين : ابي اتطلق

قام بدر وقف وما قالها شي .... قرب منها وقف يطالعها واهيه تطالعه وعيونها مغورقه
خذا مفتاح سيارته وطلع... راحت ياسمين قطت نفسها عالفراش وقامت تبجي....

قعدت ياسمين شوي ليما هدت ... راحت غسلت وبدلت هدومها وقعدت تنطر بدر يرد...

صارت الساعه 2 ونص وبدر ليلحين مارد البيت.....

دقت عليه ما رد... قعدت تنطره ليما داخت وغفت ....



قامت ياسمين الساعه 6 ونص على صوت باب الغرفه... فزت بسرعه بتشوف منو
لقت بدر مبطل الكبت يطلعله هدوم...
ياسمين : انته اهني.. متى رديت
بدر : توني
ياسمين : وين نمت ؟
بدر : ..........
ياسمين : بدر لا تروح الدوام اليوم اذا مو نايم من امس
لبس بدر دشداشته وطلع...
ردت ياسمين انسدحت وقامت تبجي ...


صار وقت ردة بدر البيت وكانت ياسمين خايفه مايرد وكانت قاعده تحاتيه لانه مو نايم من امس خافت لايصير فيه شي بالطريج بسبتها....
رد بدر لقى ياسمين ناطرته بالصاله وخلود قاعد يلعب .. طالعها وصعد فوق
نطرته ياسمين يبدل وينزل عشان يتغدا بس طول ما نزل .... راحت تشوفه فوق ...
دشت الغرفه وبدر نايم
ياسمين : بدر ؟ بدر ما تبي غدا ؟
بدر : ......
قربت منه ياسمين باست راسه : انا اسفه
نزلت ياسمين تحت قالت حق الخدامه تشيل الغدا وخذت خلود وقعدت معاه فوق
قام بدر من النوم عالساعه 6 المغرب .... طلع لقى ياسمين قاعده بره مع خالد
راح بدر خذا خلود ولمه حيل وباسه وخذاه معاه الغرفه داخل يلعب معاه
راحت ياسمين وراه ...


ياسمين : احطلك غدا ؟
بدر : لا
ياسمين : كليت شي اليوم
بدر : اممم
ياسمين : بدر بكلمك شوي
بدر : لما يرد عقلج براسج انا اكلمج
ياسمين : بس بدر ....
بدر : انا طالع ..
قام بدر حط خلود عالفراش وخذا مفتاح سيارته وطلع
قعدت ياسمين تطالعه وماقدرت تقول شي ....
مر اسبوع كامل وهذي حالتهم..... بدر يرد من الدوام ينام ولما يقعد يطلع على طول ومايرد الا بليل متاخر الوقت الي تكون فيه ياسمين نايمه... وماكان يتغدا او يتعشى معاها... اكله كله بره البيت .....



بعد هالاسبوع بدر كان توه راد من الدوام.... وياسمين قاعده تكلم الخدامه...
دش بدر والتفت عالخدامه : حطو الغدا
راح فوق بدل هدومه وغسل ونزل...
قعد بدر ياكل وكل شوي يطالع ياسمين الي كانت غصب تاكل ومنزله راسها مو قاعده تتكلم او حتى تطالعه... ارفعت عيونها لقت بدر قاعد يطالعها... هدت الاكل وكانت تبي تقوم بس بدر مسكها ...
بدر : بتقوليلي اشفيج الحين ؟
ياسمين هزت راسها يعني ماكو شي
بدر : ليش قاعده تسوين جذي ؟
طالعته وماردت ....
بدر : ياسمين كلميني ! ريحيني قوليلي شصاير !! انا الف شغله قاعده تمر على بالي ! ابليس قاعد يلعب براسي وانتي كله ساكته قولي شي
ياسمين ماقدرت تمسك نفسها اكثر من جذي ..
نزلت راسها وقامت تبجي



بدر هدها واهيه راحت تركض فوق...
قام بدر وراحلها .... قعد جدامها ....


بدر : ياسمين اشفيج ؟ من رديتي من بيت اهلج وانتي مو طبيعيه... قايليلج شي ؟ صاير شي ؟ كلميني ريحيني ! منو مزعلج ؟؟ كنا نضحك ونسولف وعايشين حياتنا... شنو صار ؟ ليش احس انج شايله هم كبير مو راضيه تقوليلي شنو اهوه !
انتي عارفه مكانج عندي ... انتي مرتي وام ولدي وحبيبتي ودنيتي وكل شي... شوفي ويهج شلون صار من البجي .. عاجبج حالنا جذي ؟ قولي اشفيج ريحيني !

http://www.upload-mp3.com/files/174771_ar1ed/Jasmin.mp3

ليش قلبج يا بعد عمــــــري حزين .... والله مب لايق عليج هـــــذا الزعل
يا حلاتج يـــوم كنتي تضحكين .... إفتحي قلبج وقولـــــي وش حصل
من تجرأ من قطــــــف هالياسمين .... من حرمه الزين قبل مــــــا يكتمل
من كسر قلبه وشعــــوره بكلمتين .... ويدري قلبه للعتب مــــــــا يحتمل
منهو أرخص قيمة الغــالي الثمين .... ويدري إنه فـــــي عيوني له محل
ومن يقــــول الورد ما يقطر حنين .... ومن يقــــــول إنه وسط قلبي ذبل
يالله قومــــــــــي يالله لا تتكيسلين .... خلي حلمي ويـــاج يوصل لي زحل
يالله قومـــــــــي يالله لا تتشاورين .... خلي حبنا يكــــــــــــون للعالم مثل



ياسمين : بدر بس ... خلاص مابي اسمع شي ( دمعت عيونها )
بدر : .......
ياسمين : بدر الدنيا مو على طول وناسه وفرح.... مو كل شي حلو يتم حلو للابد
بدر : قوليلي شصاير ... شاللي مزعلج ؟ انا ريلج ياسمين .. اذا ما تقوليلي بتقولين حق منو ؟ انا اقربلج من اي احد ثاني بالدنيا ... لا تبجين .. ماقدر اشوف دموعج اكثر من جذي!



قالت إصبر قلت إنتي تامــــــــرين .... وطالعتني بعين يملاها الـــــــوجل
ولا إراديا ذرفــــــــــــــــت دمعتين .... وقالت إنه الزين أبد مــــــــا يكتمل
قلت قولي لي ترى ســــــرك دفين .... ما بخبر حد لــــــــــو مهما حصل
بس دخيلك ما أبــــــي هالدمع يبين .... مب عشـــان شي بس والله محتمل
طالعتني وقلت لها شتطــــــــــالعين .... ما في داعي للعـــــــواطف والخجل
هذا مب وقته فــي وجهي تسرحين .... جاوبي إحساس قلبي اللي ســـــــأل



ياسمين : بيي يوم وتنسى كل هذا ... وبيصير عندك ولا شي ... واذا انته حاس بشي الحين بيروح هالاحساس مع الوقت ... مابيك تزعل او تشيل بخاطرك... بيي يوم وترد حياتك مثل قبل واحلى بعد ....
بدر : ياسمين ... لا تلفين وتدورين ! قولي الي عندج وريحيني



قالت الشدة بعد فتــــــــــــــره تلين .... والفــــــــــــــرح يقبل اذا باقي أمل
والشقى لازم فـــــــي يوم إنه يهين .... والصعب ياتيه وقـــــت يكون سهل
قلت لها قـــــــــولي لي ولا تلمحين .... ما أحب أسمــــــــــع كلام به جدل
قولي شالموضوع اذا إنك تسمحين ... وخلي الخــــــوف اللي فيني يرتحل



ياسمين : بدر خلاص .. انا مو مرتاحه معاك ... حياتي مو عاجبتني ... خل نفترق احسن.. يمكن بعدين انته تلقى وحده احسن مني تريحك... وانا مو مهم شبيصير معاي بعدين...



صــــــــــدمتي كانت معاها صدمتين .... صــــــــــدمتي كانت في هالمره دبل
ما نطقت بشي وأنــــــــا ميت حزين .... والدمـــــــــع من فوق وجناتي همل
قمت أشـــــــاهق ما أبي نوحي يبين .... كني خيل بأعلى صرخــــــاته صهل
قمنا نطــــــــــــالع بعض عين بعين .... ما تكلمنا إليـــــــــــــــــــن الليل حل
كنت أظـــــــــن إحنا لبعضنا مكملين .... ما دريت الحـــــــــــــــظ عاند بالفعل
كنت أنا وحـــــدي في عالمها سجين .... وكنت أقــــــــــول الحظ أخيرا إعتدل
قلت لها اذكر كلامــج لي الحـــــيــن ... يوم تقولي لي تراك احسن ريــــــل


بدر نزل راسه : راحتج بالطلاق ؟
ياسمين : امممم
بدر : خلاص ... لج الي تبينه بشرط
ياسمين : شنو ؟
بدر : توعديني دموعج ماتنزل مره ثانيه... وبتعيشين حياتج وانتي مستانسه...
وانا تنسيني ولا تيين تكلميني بعد ... خلود مصروفه بيوصله وباخذه كل ويك اند.. واذا في شي له شغل بخالد اهلج يكلموني مو انتي ... اعتبريني مت



قلت لها وصــــــوتي بنبراته حزين .... إوعديني هالــــــــــــزعل آخر زعل
لأنه قلبج ينعرف يــــــــــوم تزعلين .... والله مب لايــــــق عليج هذا الزعل
ومهما ناديتج أبــــــــــد لا تجاوبين .... قصة الحـــــــــب إنتهت مات البطل



بدر : توعديني ؟
ياسمين : امممم
بدر : خلاص .. باجر اروح المحكمه

قام بدر راح غرفة خالد وقعد معاه .... قعد طول اليوم معاه .. اهوه يوكله ويشربه ونومه بعد ... ولما صار الليل نام عنده بالغرفه ....



ثاني يوم الصبح راح بدر غرفته عشان يبدل ويروح الدوام ... لقى ياسمين قاعده...
بدر : متى بتروحين بيت اهلج ؟
ياسمين : بعد شوي بشيل اغراضي
بدر : اوكي .. اخذي خدامة خلود معاج
ياسمين : اوكي



لبس بدر هدومه وراح الدوام .... قعد شوي اهناك وبعدين استاذن راح المحكمه....
ياسمين شالت اغراضها كلهم واغراض خلود ... وراحت بيت اهلها
ام ياسمين : ويي ياسمين شهالاغراض هذي كلها ؟
ياسمين : انا وبدر بنتطلق
ام ياسمين : وييي اعوذ بالله ! شهالحجي ؟ ليش شصاير ؟
ياسمين : مو صاير شي يما عن اذنج بودي اغراضي فوق....



راحت ياسمين غرفتها حطت اغراضها وحطت اغراض خلود بغرفة فاضيه عندهم بالبيت وردت قعدت بغرفتها وماطلعت منها كلش ....
العصر نزلت ياسمين من غرفتها لقت بدر قاعد بالصاله يكلم ابوها ....
ياسمين : السلام عليكم
بو ياسمين : تعالي يبا ... شهالحجي ؟ صج بتتطلقون ؟
ياسمين ما تحجت طالعت بدر
بدر : اي عمي رحت المحكمه انا اليوم وطلقتها غيابي
بو ياسمين : ليش يا يبا ؟ كل شي ينحل بالتفاهم .... بينكم ولد انتو
بدر : ما عليه عمي .... سامحني اذا شفت مني شي
بو ياسمين : لا يبا ما شفت منك شي حشى ...
بدر : ياسمين ... هذي ورقة طلاقج
ياسمين خذت منه الورقه وما قالت شي
بدر : عمي اقدر اكلم ياسمين بروحنا شوي ؟
بو ياسمين : اخذ راحتك يبا ... عن اذنكم


صعد ابو ياسمين فوق وخلاهم ...
بدر : هذي ورقتج خذيتيها ... والي تبينه صار ... بس حطي ابالج شغله وحده ... انتي ام خالد ومحد يقدر ياخذ مكانج... عزيزه وغاليه ... كنتي بيوم مرتي بس طلاقنا مو معناته انه مكانج بيتغير ... لي اليوم الي اموت فيه ومكانج موجود بقلبي محد يقدر ياخذه...


لين آخر يـــــوم في روحي تسكنين .... وصورتك تبقى مثل ( بــــــــدر ) إكتمل
بالفعل قطفوا زهـــــــــور ( الياسمين ) .... قطفوا الزهره قبل مــــــــــــا تكتمل

البارت التاسع




بغرفة ياسمين ... ياسمين قاعده عالفراش ومخليه خلود يلعب قاعده تطالعه...
دشت عليها ساره
ساره : صباح الخير
ياسمين : صباح النور ... رايحه دوامج ؟
ساره : ايي ... الحين خلاص تطلقتي ؟
ياسمين : اممم
ساره : ماكو امل تغيرين رايج ؟
ياسمين : لا ... وادري شقاعده تفكرين فيه... لا تقولين حق عمر اني تطلقت
ساره : دام ما تبينه يدري شحقه تطلقتي ؟
ياسمين : لاني بس مو قادره اعيش بهالوضع ... عايشه مع بدر وعقلي وقلبي طول الوقت مع عمر ... حاولت اتغير حاولت اصير زينه مع بدر .. حاولت اعيش حياتي طبيعيه ... بس لما شفت عمر كل شي تغير ... ردتلي كل المشاعر الي كنت احاول اجذب على نفسي واقول انها مو موجوده !
ساره : ومستانسه جذي الصبي بعيد عن ابوه ؟
ياسمين : ابوه بياخذه كل ويك اند وقالي اذا في شي له شغل بخلود دقو عليي
ساره : مادري كيفج على راحتج ... يلا انا طالعه
ياسمين : الله معاج ...





طلعت ياسمين من العده ... وبدر كان كل اسبوع ياخذ خلود مع خدامته ويردهم بعدين بدون لا ينزل يسلم او حتى يكلم ياسمين ... اهل بدر طبعا انقطعت علاقتهم فيها ولا يدقون عليها واهيه مافكرت تدق عليهم خايفه من ردة فعلهم.... يعني انقطعت علاقتها باهل بدر كلهم وكل شي له شغل فيه ..




ياسمين كانت طول وقتها بغرفتها ما تطلع ... ماتطلع الا اذا كانت تبي تشتري شي حق خالد ... وطبعا لانها ما تشتغل فـ ما عندها فلوس تشتري فيهم اغراض حقه الا من مصروفه الي بدر قاعد ينزله بحسابها ... وما كانت ترضى تاخذ شي من اهلها عشان ما تحس انها ثقيله عليهم الحين اكثر من قبل لا تتزوج ....

بعد اسبوعين ...
ياسمين قاعده بغرفتها .... يتلها امها
ام ياسمين : يما ياسمين ... لبسي ونزلي
ياسمين : ليش منو عندنا ؟
ام ياسمين : ناس يبون يشوفونج
ياسمين : يشوفوني شنو يعني ؟ بيخطبوني ؟
ام ياسمين : اي ... يلا قومي لا تطولين
ياسمين : يدرون اني مطلقه وعندي ولد ؟
ام ياسمين : اي يما يدرون ... يلا فشله قاعدين بروحهم
ياسمين : الحين اقوم ..



طلعت ام ياسمين .. ياسمين لبست نفنوف بسيط وعدلت شعرها وحطت كحل وقلوس ونزلت... اهيه ما كانت حاطه ابالها تبي تتزوج بس لانه الناس تحت وامها نادتها عشان جذي قررت تنزل ...
طلت من الدريشه تبي تشوف السياره ...
شافت سياره عمر .... وقفت جدام الدريشه تتاكد ... تاكدت انها سيارته ... طاحت عالارض ريولها مو شايلتها .. قامت ترجف.... قعدت خمس دقايق متنحه وترجف ..... لما هدت شوي نزلت تحت ....
شافت ... عمر ......




ياسمين : الـ سـلام عليـ كم
ام ياسمين : تعالي يماا قعدي اشفيج مخترعه اسمالله عليج
اخت عمر ( نوره ) : شكلها مستحيه
ياسمين كانت عينها على عمر ماقدرت تشيلها عنه مو مصدقه انه جدامها ....
قعدو ام ياسمين ونوره وعمر يسولفون ويتحجون وياسمين متنحه بس تطالع عمر ...
ياسمين كانت ليلحين مو مستوعبه شي ... استاذنت وقامت راحت فوق بسرعه....



دشت غرفة ساره....
ساره : باسم الله ! اشفيج
ياسمين : عمر .... عمر اهني
ساره : ادري انه اهني
ياسمين : مو قلتلج لا تقوليله تطلقت ؟ ليش قلتيله ؟
ساره : ياسمين عمر كان يدق عليي تقريبا كل يومين او ثلاث وكل مره يسمع صوت خلود ماقدرت اجذب عليه اكثر من جذي ... وحلفني اقوله الصج
ياسمين : اهوه ياي يخطبني ؟
ساره : اي ياسمين اشفيج منصدمه ؟
ياسمين : مادري ... خلود ؟
ساره : خلود ولدج وبيظل معاج اشفيج خايفه ؟
ياسمين : مادري ... بروح غرفتي ..
ساره : اوكي
راحت ياسمين غرفتها بسرعه وقعدت تفكر بالموضوع ... ما توقعت هالشي يصير ....
يت امها ...
ام ياسمين : ها ياسمين ... شرايج فيهم ؟
ياسمين : مادري يمه مادري ... افكر وارد عليج
ام ياسمين : ترا مركزه وايد زين ... واهمه عايله معروفه بعد وماعليهم قاصر ... يعني بيعيشج عيشة احسن من الي كنتي عايشتها ...
ياسمين : مادري يما خليني افكر
ام ياسمين : خلاص على راحتج ...
طلعت ام ياسمين وصكت الباب ...




دق تلفون ياسمين .. كان رقم غريب .... ردت بسرعه وجنه قلبها حاس ....
عمر : اقدر اقولج مرتي ولا تو الناس ؟
ياسمين : هه حبيبي ... بغيت تفضحني تحت... جذي تيي بدون ما تقولي
عمر : كنت ابيها مفاجأة ... بس انتي ويهج كان مو صج هههه
ياسمين : بذبح ساره ... ولا يابتلي طاري عن اي شي !
عمر : انا قايلها ... ياسمين ليش ما قلتيلي انج تطلقتي ؟
ياسمين : ما كان له داعي اقول ... انا ما تطلقت منه عشان اردلك
عمر : يعني تدرين انج حتى لما تتطلقين بيي اخذج ... وهم ماهتميتي تقوليلي ؟
ياسمين : عمووور ... احبك .. بس عندي ولد لازم افكر فيه ... انا تطلقت من بدر لاني مابي اظلمه وياي .... بس ما تطلقت عشان اييلك
عمر : والحين ؟ بترضين نتزوج ؟
ياسمين : وخلود ؟
عمر : ياسمين ولدج بعيوني ... اهوه صج مو ولدي بس كافي انج امه ..
ياسمين : عمور اخاف اظلمه بهالزواج
عمر : ياسمين ؟ ماكو ثقه فيني ؟ قلتلج بعيوني
ياسمين : خلاص اوكي
عمر : اوكي بتصيرين مرتي ؟
ياسمين : ههههه اي
عمر : تبين عرس ؟
ياسمين : عمر اشفييييك تو الناس ترا
عمر : قولي يلا عشان يمدينا نجهز ... تبين عرس ؟
ياسمين : لا مابي مو لازم ... كافي اني بصير معاك
عمر : خلاص ولا يهمج ... متى بتقولين حق اهلج انج موافقه ؟
ياسمين : ههههههه عمررررر ! اشفيك انته
عمر : ابيج عندي اشفيج ! مو مصدق انج بتصيرين مرتي !!
ياسمين : خلاص باجر اقول حق امي ...
عمر : اوكي ... اطلب منج طلب ؟
ياسمين : شنو ؟
عمر : ابي انام وانتي عالخط اليوم
ياسمين : امممممم لا ماكو
عمر : ليش ؟
ياسمين : عشان تشتاقلي اكثر
عمر : اكثر من جذي ؟ حرام عليج !!!!!!!
ياسمين : ههههه احسن عشان تتادب ... عشان ماتروح وتخليني مره ثانيه
عمر : تحسسيني هادج بكيفي !
ياسمين : ههه اطفرك !
عمر : ماحب هالغشمره ... تغشمري بكل شي الا هالموضوع ..
ياسمين : انشالله ولا يهمك ... ممكن تروح الحين ؟
عمر : اروح وين ؟
ياسمين : يلا بس ... مابي اكلمك لي العرس
عمر : سووووووومه حرام عليج !
ياسمين : ههه تدري ولهت عالنك نيم الغبي الي معطيني اياه
عمر ؟ سومه ؟ ليش حلو مو غبي
ياسمين : مادري يضحكني ... عمر وين امك ؟ ليش ما يت ؟
عمر : ما تبي تيي
ياسمين : ليش ؟
عمر : لانج مطلقه
ياسمين : وشلون انته ياي تخطبني واهيه مو راضيه ؟
عمر : المهم انا الي ابيج ... مالي شغل فيها
ياسمين : بس عمر اخاف تسويلنا مشاكل بعدين
عمر : ما عليج .. ماكو الا كل خير
ياسمين : امي ما سالت عن امك ؟
عمر : امبله بس قلتلها انها تعبانه واختي يت بدالها
ياسمين : اختك راضيه ؟
عمر : ساحلتها عشان تيي
ياسمين : يعني اهلك ما يبوني صح ؟
عمر : مو مكفيج انا ابيج ؟
ياسمين : امبله بس ...
عمر : لا بس ولا شي ... لا تطلعين اعذار
ياسمين : خلاص اوكي




ثاني يوم ياسمين قالت حق امها انها راضيه وبسرعه ملجو وصار كل شي ....

ملجو وخلصو طبعا عمر كان (بروحه) ويا خذا ياسمين من بيتهم وراح بيت اهله ...
دشو داخل لقو امه واخته وخالته موجودين ....
ياسمين وعمر : السلام عليكم
ام عمر : شرفت ويبت المسعده معاك ؟
عمر : يما !
ام عمر : ويعه لا تقولي يما ... روح طس غرفتك انته وياها !
ياسمين طالعت عمر وما تحجت ردت التفتت على امه وخالته ... لقتهم كلهم يطالعونها بنظرات انه مو عاجبتهم ...
مسكها عمر : امشي امشي... وين الخدم خل يشيلون الجناط ؟
ام عمر : هذول خدمي انا ... مالك شغل فيهم ... شيل جناطك انت والي معاك
عمر : امشي فوق ...
ياسمين صعدت مع عمر فوق وما قالت شي ودشو الغرفه ...
ياسمين : عمر احنا بنسكن اهني ؟
عمر : اي ليش ؟
ياسمين : مو نطلع بيت بروحنا احسن ؟
عمر : ليش نطلع ؟ البيت شكبره
ياسمين : اي بس عندك خير ونقدر عالاقل ناجرلنا شقه او تشوفلنا بيت صغير باي مكان
عمر : ماله داعي .. البيت كبير واونسلج في احد بدال قعدة البيت بروحج
ياسمين : بس اهمه مبين مو بالعيني ...
عمر : ياسمين ! لا تبدين بالنكد عاد !!!!!!!!

البارت العاشر

عمر : ياسمين ! لا تبدين بالنكد عاد !!!!!!!!
التفتت ياسمين على عمر مصدومه من رده
عمر : اسف اسف .... بس تنرفزت منهم ماكنت اقصد
ياسمين : اممم
قرب منها عمر : اسف لا تزعلين
ياسمين : مو زعلانه عادي... بتييب الجناط الحين ؟
عمر : لا
ياسمين : ها عيل ؟ ببدل هدومي
عمر : مو لازم تبدلين... بنروح المطار
ياسمين : المطار ؟ ليش ؟
عمر : نشوفلنا اقرب رحله ونسافر
ياسمين : هه من صجك ؟
عمر : اي والله
ياسمين : زين الجناط وايد مو محتاجه كل هالاغراض انا
عمر : امبله تبينهم كلهم .... بنطول بالسفره
ياسمين : اي بس ....
عمر : خلود ؟؟ خالد عند امج لا تحاتينه واذا تبين كلمي امج قوليلها تقول حق ابوه ياخذه على مانرد
ياسمين : لا مابي .... اخاف يقول ما صدقت تزوجت وقطت الياهل ..
عمر : خلاص دقي على امج عيل وصيها عليه... وتوج شايفته بعد ومسلمه عليه قبل لا نيي يعني ماله داعي نروح مره ثانيه بيتكم... صح ؟
ياسمين : هههه جنك تدري كنت قاعده افكر جذي
عمر : اعرفج اكثر من نفسج... يلا نمشي ؟
ياسمين : اوكي



نزلو ياسمين وعمر تحت....
ام عمر : وين رايح ؟ توك داش
عمر : ياي اسلم وامشي
ام عمر : ليش ؟ بتهاجر ؟
عمر : -بسافر... اشوفكم على خير
سلم عمر على امه وخالته واخته وراح حق ياسمين
ياسمين : عمر ...
عمر : لا تسلمين ... مو الحين ... امشي
حط ايده على جتفها وطلعو




ام عمر : شفتي ؟ يقولها لا تسلمين ! لا ساحرته ... اكيد ساحرته
نوره : يما ذكري الله ! اشفيج عالبنيه... ما مداها دشت بيتنا كليتيها
ام عمر : يعني انتي راضيه اخوج ماخذ هذي ؟
نوره : مو راضيه عادي ... حياته واهوه حر
ام عمر : انا ما ارتاح الا اذا خليته يطلقها !
دقت ياسمين على امها واهمه بالطريج وصتها على خالد وكلمته بعد وكانت تحاول تطول بالمكالمه شوي وتسحب منه الحجي غصب لانها حاسه انها بتوله عليه وايد وخايفه لا يوله عليها ويفقدها ....
وصلو المطار ... نزلو ولقو حجز حق دبي بعد 3 ساعات ...
حجزو وراحو قعدو بستاربكس يشربون قهوه....
عمر : نقعد بدبي يومين... وعقبها نحجز مكان ثاني ماشي ؟
ياسمين : اوكي
عمر : سومه ادري ضاق خلقج من اهلي بس ميخالف مع الايام يتعدلون
ياسمين : عادي ... اي ام بالدنيا ماراح ترضى ولدها ياخذ مطلقه وعندها ولد بعد
عمر : المهم احنا مستانسين ... صح ؟
ياسمين : لا ... المهم احنا مع بعض ... مستانسين ولا مو مستانسين ... ما عليي من احد الحين.. حبيبي عندي ماكو شي يهمني بعد





راحو دبي....
ثاني يوم كانو توهم رادين من السوق ....
عمر : يلا وين تبينا نروح بعد ؟
ياسمين : شرايك نقعد يومين زياده بعد... وعقبها نرد الكويت .. وبعد جم يوم نرد نسافر مره ثانيه وين ما تبي ...
عمر : تحاتين خلود صح ؟
ياسمين : ههه اي
عمر : خلاص اوكي ... عقب باجر نرد
ياسمين : تسلملي بعد عمري ... ما شريت شي حق خلود حبيبي ما شفت اغراض حلوه حق اليهال
عمر : ادري ... قلت باجر بوديج نشتريله عشان لا يضيق خلقه
ياسمين : صج ؟ متى ؟
عمر : من الصبح لي الليل ... اليوم كله بيصير بس حق اغراض خلود
ياسمين : امممممممم واليوم شبنسوي ؟
عمر : بنرتاح شوي الحين وبنطلع نستانس عشان خلود بيلهينا وايد باجر
ياسمين : ههههه اوكي ..




وثاني يوم راحو يشترون حق خلود العاب وهدوم وكل شي ... واي شي كانت تمسكه ياسمين حتى لو بس تطالعه كان ياخذه عمر ويشتريه حق خالد.. وياسمين كانت مستانسه وايد معاه ...

ردو الكويت ... وعلى طول من المطار راحو بيت اهلها .....
ام ياسمين : هلا هلا ببنيتي هلا
ياسمين : شلونج يما ( باست راسها )
ام ياسمين : هلا يما تمام الله يسلمج... الحمدلله عالسلامه
ياسمين : الله يسلمج ..
ام ياسمين : وين عمر ؟
ياسمين : بره الحين ينزل ... وين خلود يما ؟
ام ياسمين : خلود عند ابوه
ياسمين : بس اليوم مو ويك اند .. ليش ماخذه ؟
ام ياسمين : قلتله انج مسافره يوم يا خذاه ذاك اليوم وقالي بخليه عندي على ما ترد... ما قلتيلي انج راده جان قلتله اييبه
ياسمين : يما تكفين دقي عليه خل اييبه ولهانه عليه
ام ياسمين : انشالله الحين ادق
دش عمر ...
عمر : السلام عليكم
ام ياسمين : هلا عمر وعليكم السلام
عمر : شلونج عمتي ( باس راسها )
ام ياسمين : بخير يما انت شلونك ؟
عمر : بخير الله يسلمج..
ياسمين : يمااااااا يلااااااااااا
ام ياسمين : زين زين لا تاكلين قلبي
عمر : اشفيج ؟
ياسمين : بدر ماخذ خلود عنده
عمر : ليش ماخذه ؟ مو قلتي ياخذه بس ويك اند !
ياسمين : اي بس لاني سافرت خذاه
سكت عمر ما قال شي ....
ام ياسمين : كا يما الحين اييبه ماراح يطول
ياسمين : بالبيت اهمه ؟
ام ياسمين : لا كانو طالعين وتوهم بيردون يعني ماراح يطولون
ياسمين : زين اشوه
عمر : عمتي .... هالجنطه كل الي فيها حقج انتي وساره وجم شغله حق عمي بعد
ام ياسمين : ماشالله يما الجنطه شكبرها ... ليش يايبين هالكثر
ياسمين : كلهم من عمر .... كل ما شاف شي خذاه حقكم
ام ياسمين : وييي عمر كلفت على عمرك... الحين كل هذوله بجم شاريهم الله يهداك
عمر : ما عليه ما يغلى عليكم شي ....
ام ياسمين : ياسمين رحتي سلمتي على خالتج ؟
ياسمين : لا يينا من المطار على طول اهني .. بس خل ايي خلود ناخذه معانا ونروح... وين ابوي عيل ؟
ام ياسمين : طالع ... ما قلتو انكم رادين جان قلتله عشان ايي
ياسمين : لا عادي ما عليه اشوفه بعدين



قعدو يسولفون شوي ووصل بدر وسمعت ياسمين صوت سياره بره وقامت ركضت بسرعه
بطلت الباب لقت بويهها بدر قاعد ينزل خالد من السياره ويبوسه ويلمه...
شاف ياسمين حط خالد عالارض وركب السياره ومشى بسرعه ....
ياسمين شافته ونزلت راسها بسرعه وراحت حق خلود
ياسمين : تعال حبيبي ولهانه علييك ( شالته ودشت داخل )
عمر : وين خلود ... اووو كاهو البطل
قعدت ياسمين يم عمر وخلود بحضنها
عمر يحاول يكلم خلود وخلود لازق بياسمين ويطالعه ومو راضي يحاجيه
ياسمين : ماما خلوووود يبنالك العاب واااااااااااايد والحين بتيي معانا بيتنا اليديد بعد...
خالد ما قال شي بس قاعد يطالع ياسمين ويرد يطالع عمر .....
قامو عمر وياسمين عشان يروحون البيت....



بالطريج ....
ياسمين : عمر هذا مو طريج بيتكم
عمر : ادري
ياسمين : وين مودينا ؟
عمر : الحين تشوفين ... كا وصلنا
ياسمين : بيت منو هذا ؟
عمر : نزلي وتعرفين
ياسمين : انزل خلود بعد ؟
عمر : اي كلنا بننزل..
نزلت ياسمين مع عمر ودشت البيت وراه ....
كان البيت صغير شوي واثاثه قديم ... دشت ياسمين وماكان في احد
عمر : هذا الحين يا طويلة العمر بيتنا ....
ياسمين : شنو ؟
عمر : اشفيج مصدومه ... هالبيت ابوي بانيه ومسجله باسمي من زمان عشان لما اتزوج اسكن فيه ... بس الاثاث قديم شوي واحنا تزوجنا بسرعه ما مداني اغيره .. عشان جذي وديتج بيت اهلي اول شي ... وسافرنا عشان اخلي احد ايي يعدل البيت وينطر الاثاث اليديد بس انتي ما رضيتي الا بتردين .. تحملي البيت جذي عاد على ما يوصل الاثاث الي اخترته
وترا الثلاجه فاضيه ... يعني وراج روحه حق الجمعيه بعد شوي ... قلتلج تحملي هههه
ياسمين : وااي بعد عمري عمووور الله يخليك لي تسلم
عمر : يلا انا خل اروح انزل الاغراض من السياره شكثرهم
ياسمين ( حق الخدامه ) : روحي نزلي الاغراض مع بابا




يابو عمر والخدامه الاغراض واول شي سوته ياسمين طلعت اغراض خلود وقامت توريه الالعاب الي يايبينهم والهدوم عشان يستانس شوي ...

عقبها راحت بتطلع الهدوم من الجنطه وتحطهم بالكبت...
عمر ( منسدح بالفراش ) : شتسوين ؟
ياسمين : بحط الهدوم بالكبت
عمر : اشفيج ! مو قلتلج بنييب اثاث يديد ؟
ياسمين : امبيه نسيت
عمر : خليهم بالجناط ماراح يطول الاثاث يمكن باجر او عقبه يوصل مو متاكد.. بس ادق عليهم بعد شوي اسال
ياسمين : امممم اوكي ... بتنام ؟
عمر : اي .. ليش ؟
ياسمين : ماراح نروح حق اهلك اليوم ؟
عمر : امبله بليل نروحلهم مو الحين
ياسمين : اوكي عيل اخليك تنام
عمر : وين رايحه ؟
ياسمين : اقعد مع خلود
عمر : تعالي يمي ونامي شوي من الصبح وانتي تلويين
ياسمين : اوكي
راحت يمه باست خده ونامت .

البارت الحادي عشر ...




قامت ياسمين عقب ساعتين...
ياسمين : عمووور ... حبيبي
عمر : همممم
ياسمين : يلا قووم
عمر : تو الناس
ياسمين : ههه اي تو الناس يلا قوم الساعه صارت 6 المغرب
عمر : زين قومي لبسي انتي ولبسي خلود وردي قعديني
ياسمين : بنروح بيت اهلك ؟
عمر : اي ..
ياسمين : زين ليش ناخذ خلود خله اهني
عمر : يقعد اهني شيسوي بروحه ؟
ياسمين : ميخالف مع خدامته وعنده العابه شكثرهم الي شريناهم .. مو لازم ناخذه معانا
التفت عمر عليها وطالعها : خايفه من امي ؟
ياسمين سكتت ماردت
عمر : خلاص ما ناخذه هالمره بس المره اليايه ايي معانا
ياسمين : اوكي ... يلا اقوم البس وارد اقعد
عمر : لا والله ؟ بس صحيت ... عندج عشر دقايق تلبسين فيهم على ما اتسبح
ياسمين : عمووور ما يمدي عشر دقايق
عمر : صارو 9
ياسمين : خلاص خلاص


قامت ياسمين بسرعه ... بدلت ولبست وسوت شعرها وقعدت تحط ميك اب
طلع عمر من الشور وطالعها
عمر : ها ما خلصتي ؟؟؟
ياسمين : عمور بس باقي ميك اب انطر دقايق بس
عمر : ههههه اشفيج جذي تكسرين الخاطر ؟
ياسمين : مادري اخاف تزف هههه
عمر : خلصي يلا خل البس واروح العب مع خلود
ياسمين : اوكي ....



حطت ياسمين ميك اب وعدلت لبسها وشعرها وتعطرت وطلعت تشوف عمر ...
راحت الغرفه الي حطو فيها اغراض خلود ... وقفت عند الباب تطالع .. لقت عمور ماسك خلود وقاعد يلعبه وخلود ميت ضحك ومستانس
خالد : ماما ماما شوفي
عمرالتفت : ها خلصتي ؟
ياسمين : ايي
عمر : واشفيج ما تحجيتي ... يلا خل نمشي .. ( طالع خالد ) ... شويه ونرد ناخذك ونطلع مع بعض انزين ؟
خالد : ايي
عمر : وا لاااابي ( باسه )
ياسمين : ههههههههه
عمر : اشفيج تضحكين انتي بعد ؟
ياسمين : على وا لابي .... ليلحين تقولها ؟
عمر : ايييي ... يلا خلصيني
ياسمين : زين لحظه
راحت حق خلود باسته
ياسمين : ماما شويه ونرد انزين ؟
خالد : انزين
ياسمين : عفيه عالشاطر ... يلا باااي
خالد : ببببااااي



راحت حق عمر
ياسمين : يلا مشينا ؟
عمر : يلا... ( لمها ومشو )

بالطريج... ياسمين ساكته
عمر : اشفيج ؟
ياسمين : ها ؟
عمر : ليش ساكته ؟ لي هالدرجه خايفه
ياسمين : مادري قاعده احاتي
عمر : لا تحاتين شي... ذاك اليوم كانو معصبين عليي والحين اكيد هدو ... وبس بعد طلعنا من البيت يعني شتبين بعد ؟
ياسمين : عموور ترا ما قلت انا طلعني من البيت بوخرك عنهم
عمر : ادري حبيبتي بس احسلنا عن عوار الراس والمشاكل
ياسمين : اممم




وصلو البيت ونزلو ...
عمر مشى قبل ياسمين ... ياسمين لزقت بظهره وماسكه التي شيرت
عمر : هههه اشفيج ؟ ماراح ياكلونج والله
ياسمين : وااي عمر مادري مو مرتاحه
عمر : امشي ما عليج... ماراح نطول لا تحاتين


دشو البيت ...
عمر وياسمين : السلام عليكم
ام عمر ( عوت حلجها ) : وعليكم السلام
نوره : اهليييين ... عمور ولهت عليييك
عمر : ههه توله عليج العافيه
نوره (طالعت ياسمين ) : شلونج ؟
ياسمين : تمام الله يسلمج



راح عمر يبوس راس امه ووراه ياسمين....
امه ما قالت شي ساكته ....

قعدو ياسمين وعمر وكانت نوره تسولف مع عمر وياسمين ساكته.... ام عمر بس تطالعهم وما تقول شي ....


ام عمر : متى بتييب اغراضك عمر ؟
عمر : لا يما نزلت ابيتي
ام عمر : هوو .. ليش ؟!
عمر : بس اكبر
ام عمر : الحين بيتك اكبر من اهني ؟
عمر : قصدي اكبر حقنا وحق الخدامه والياهل
ام عمر : اي ياهل ؟ توكم متزوجين
عمر : يما اقصد خالد ولد ياسمين
ام عمر ( خزت ياسمين من فوق لي تحت ) : امممممم
نوره : ياسمين جم عمر خلود ؟!
ياسمين ( ابتسمت ) : سنه و 8 شهور
نوره : صغير يحليله ...
ام عمر : بس سنه ؟ هو جم قعدتي مع ريلج ؟
ياسمين التفتت على عمر
عمر : انا ريلها يما ...
ام عمر : ايي اقصد الي قبلك يعني ... جنها مو مطوله معاه... وليش هديتيه عاد ؟
عمر : يما وبعدين ؟
ام عمر : امممم ... عن اذنكم اخذو راحتكم... انا رايحه انام
ياسمين نزلت راسها ...
عمر : قومي ياسمين ...
نوره : تو الناس عمر اقعد ولهانه عليك
عمر : مره ثانيه.. مع السلامه
قام وقف عمر وقامت ياسمين.. مسك ايدها ومشو...
طلعو من البيت وقبل لا يوصلون السياره رفع ايدها وباسها ...
ياسمين طالعته ابتسمت وما قالت شي ...



بالطريج ....
عمر : خلود شيحب ياكل
ياسمين : شنو ؟ عشى ؟
عمر : اي يعني شنو في هالحزه غير العشى
ياسمين : الحين اكيد تعشى
عمر : ميخالف حتى لو متعشي لا ندش البيت وما معانا شي حقه
ياسمين : امممم ... يحب البيزا اهوه
عمر : يلا اوكي... اخذله وجبة اطفال واحنا ناخذلنا الكبيره اوكي ؟
ياسمين : اوكي



ردو البيت ولقو خلود قاعد يلعب بالصاله واول ما شافهم نقز على ياسمين
ياسمين : حياااااتي ولهت عليي ؟
عمر : خلود وانا ليش ما تلمني ؟
خلود طالعه ضحك ولزق بياسمين اكثر
عمر : خلاص ماني معطيك بيزا !!!!
خلود طالع ياسمين جذي 



ياسمين : واااي عمور عطه كسر خاطري
عمر : تتدلع على امك ها ؟؟؟
حط عمر الاكل عالقنفه الي يمه وشال خلود ويسوي روحه يعض بطنه وخلود يضحك
ياسمين : بس بدووور لا تاذيه
عمر التفت عليها وما قال شي
ياسمين انتبهت انها غلطت باسمه وسكتت
خالد : وين بابا ؟

عمر (بعصبيه) : شيلي الاكل حطيه عالطاوله على ما اغسل وارد
ياسمين : عمر انا ..
عمر : يلا بسرعه يوعان
عمر حط خلود عالارض وراح فوق يبدل ...
ياسمين ما قالت شي بس حطت الاكل عالطاوله وراحت يابتلهم شي يشربونه وقعدت خلود بحضنها ....
نزل عمر وقعد...
خلود كان قاعد يطالع عمر ويسويله حركات بويهه
عمر : هههه تعال تعال
خذاه من ياسمين وحطه بحضنه وقعد يلعبه ويوكله ويسولف معاه
ياسمين : عمر اكل بيبرد الاكل
عمر : لحظه خل يخلص خلود
ياسمين : بس يبرد اكلك
طالعها عمر : ياسمين مو زعلان لا تحاتين
ابتسمت ياسمين : عطني خلود انا اوكله ... انته اكل انا شبعت
عمر : اوكي
خلصو عشاهم وياسمين راحت نومت خلود وردت الغرفه حق عمر ....
ياسمين : ما نمت ؟
عمر : كا الحين بنام ... كنت ناطرج تيين
ياسمين : بغيت شي حبيبي ؟
عمر : لا كنت بسالج... بو خالد بيي باجر ياخذ خلود من اهني ؟

البارت الثاني عشر



عمر : لا كنت بسالج ... بو خالد بيي باجر ياخذ خلود من اهني ؟
ياسمين : اي يعني من وين بياخذه عيل اذا خلود قاعد اهني
عمر : امممم... وشلون بيدل البيت وبتدرين انه بره عشان تطلعيله خلود ؟
ياسمين : مادري ما سالت... باجر ادق على امي واقولها تكلم بدر
عمر (بعصبيه): اسمه بو خالد !
ياسمين : عمر اشفيك
عمر : مافيني شي ..
ياسمين : عمووور ... انا ما هديته الا وانا متاكده 100% اني مابيه وماله شي عندي ...
عمر : اوكي حتى لو !! انا ريال ياسمين ! عبالج ماغرت لما طلعتي تركضين حق خلود واهوه ليلحين بره ما مشى وشافج ؟ بس سكت لانه تونا متزوجين ... ومساع غلطتي باسمي وقلتي اسمه وما قلتلج شي ! بس لي اهني وخلاص ...
ياسمين : عموور اسفه
عمر : مو قاعد اقولج هالحجي عشان تقولين اسفه !
ياسمين : عمووور !! ( قربت منه ولمته ) احبك
عمر : انا تعبان بنام
ياسمين (وخرت) : لا والله ؟ يعني زعلان
عمر : مو زعلان بس تعبان
ياسمين : احلف مو زعلان
عمر : وغلات ياسمين مو زعلان
ياسمين : ههه اوكي صدقتك...




ثاني يوم....
قامت عمر على صوت تلفون ياسمين...
عمر : ياسمييين .. ياسمييييييين
ياسمين : هممم .. تلفوني هذا ... هذي امي ( ردت عالتلفون )
ياسمين : هلا يما ؟
ام ياسمين : ها حبيبتي قعدتج ؟
ياسمين : اممم اشفيج صاير شي ؟
ام ياسمين : لا بس بدر دق يسالني شلون ياخذ خلود
ياسمين : ايي اقطه عندج البيت بعد شوي بس خل اريقه والبسه واييبه
ام ياسمين : وكل اسبوع جذي ؟
ياسمين : اي
ام ياسمين : خلاص يلا عيل ادق عليه اقوله... مع السلامه
ياسمين : مع السلامه...



عمر : تسال عن خلود ؟
ياسمين : اي... خل اقوم اسبحه واريقه واوديه بيت امي
عمر : اوكي

قامت ياسمين تغسل وراحت قالت حق الخدامه تسوي ريوق حق خلود وراحت تقعده
دشت غرفة خلود لقت عمر منومه على صدره وقاعد يسولف معاه



ياسمين : انته متى قمت ؟
عمر : عقبج على طول ههه ييت اقعد القطو
خلود : انا مو قطو... انا ارنب
عمر : واااا حلاتهم الارانب ... انا اقوى منك وباكلك
قام عمر ونط على خلود جنهم يتهاوشون



ياسمين : ههههه بس بس وخر خل اسبحه....
عمر : ما يبي يتسبح اهوه
ياسمين : لا تخرب الصبي عليي ... قوم خلود ماما يلا حمام
عمر : ما يبي اقولج عيب تشوفينه مفصخ... صح خلود ؟
خلود : ايييي
ياسمين : لا والله ؟
عمر : اي
ياسمين : قوم سبحه انته عيل
عمر : ايوااا يلا قوم قوم خلود
ياسمين : تعرف ولا تطيحه ؟
عمر : شنو ياهل انا ؟ يلا يلا خلود الحمام
ياسمين : انطر اطلع اغراضه
عمر : لحقينا فيهم الحمام



راح عمر وسبح خلود وكان قاعد يلعب معاه ويضحكه وخلود مستانس وايد...
ولما طلعو قعد يوكله ويلعب معاه ... راحت ياسمين بدلت هدومها ولبست خلود

ياسمين : عموور انا بقعد عند امي شوي بعد اوكي
عمر : اوكي بس ....
ياسمين : ادري ادري .... يلا باي
عمر : باي



راحت ياسمين بيت اهلها ونزلت قعدت تسولف مع امها ... دق تلفون البيت وشالته امها
ام ياسمين : الو.... اي يلا الحين اقولهم يطلعون... مع السلامه
ياسمين : بدر ؟
ام ياسمين : اي.... يلا خل اقول حق الخدامه تطلع

قامت ام ياسمين تنادي الخدامه وياسمين راحت تطل على بدر من الدريشه....
طلعت الخدامه وماسكه خلود.... اول ما شافه بدر شاله وقعد يبوسه ولمه... وما مشو يمكن 5 دقايق بس يسولف معاه بالسياره.....



قعدت ياسمين تطالع بدر... كان حده متغير .. ضعفان ومبين تعبان ومتضايق
ام ياسمين : تغير ها ؟
ياسمين : اي وايد... شلونه ؟ مستانس ؟
ام ياسمين : ما يسولف وايد ...
ياسمين : امممم
ام ياسمين : شلون عمر معاج ؟
ياسمين : تمام الحمدلله
ام ياسمين : احسن من بدر ؟
ياسمين : يما شهالسؤال ... هذا غير وهذا غير
ام ياسمين : بعد قلت يمكن ... الحين مستانسه وعقب جم شهر تييني ما تبينه




ياسمين تضايقت من كلمة امها بس ما قالت شي وراحت قعدت مكانها ...
دق عليها عمر ...
ياسمين : هلا حبيبي
عمر : ها وينج ؟
ياسمين : عند امي ليلحين
عمر : راح خلود ؟
ياسمين : اي قبل شوي ...
عمر : انزين ترا بروح احجزلنا الاسبوع الياي نسافر
ياسمين : وين ؟
عمر : نروح لندن اسبوعين
ياسمين : و خلود ؟
عمر : خلي امج تكلم ابوه اذا يرضى ايي معانا ... واذا ما رضى يقعد عند ابوه على مانرد
ياسمين : خلاص لما يرد خلود اقول حق امي تكلمه مو الحين ...
عمر : اوووكي ... متى بتردين ؟
ياسمين : مادري ليش ؟
عمر : امشي نطلع نستانس



ام ياسمين : هذا عمر ؟
ياسمين : اي
ام ياسمين : قوليله ايي يتغدا عندنا اليوم

ياسمين : عمور امي تقول تعال تغدا عندنا اليوم
عمر : خلاص اوكي
ياسمين : ديربالك بالطريج
عمر : اوكي باي
ياسمين : باي

راح عمر بيتهم عقب ساعتين وكان داش معاه حلو ومعجنات ...




ام ياسمين : الله الله عمر شنو كل هذا
عمر : شدعوه عمتي مو يايب شي
ام ياسمين : كل هذا ومو يايب شي ... ياسمين ريلج يبيله طق
ياسمين : هههه ميخالف فلوسه زايده يبي يقططهم عالاكو والماكو
عمر : لا مو عن فلوسي زايده ... بقص على ياسمين شوي واساحلها
ياسمين : تساحلني ؟ ليش ؟
عمر : الاثاث وصل وحطوه بالبيت يعني وراج تنظيف وترتيب
ياسمين : واااااااي عمر
عمر : هههه شسوي بعد يعني ؟
ياسمين : ما عندنا خدامه بسوي كل هذا بروحي انا ؟
عمر : لا انا بساعدج بترتيب الاثاث بس
ياسمين : يما شووووفيه
ام ياسمين : اخذي خدامتنا تساعدج ورديها لما تخلصين
ياسمين : خلاص اوكي ....



وصل ابو ياسمين واختها وقعدو كلهم يتغدون وعقب الغدا قعدو يسولفون وجاي وقهوه وحلو وسوالف ...

عمر : يلا ياسمين ... مشينا ؟
ياسمين : لا لا تو الناس
عمر : وين تو الناس ورانا شغل بالبيت
ياسمين : ادري ... عشان جذي قلت تو الناس ...



دق تلفون بو ياسمين ...
بو ياسمين : هذا بدر ... الووو هلا بدر
ياسمين قلبها نغزها وقعدت تطالعه
بو ياسمين : لا ؟ يلا يلا يايين
ياسمين : شصاير يبا ؟
بو ياسمين : خلود طاح وتعور
ياسمين : يما ولدي اشفيه ؟ شصار؟
بو ياسمين : مادري رايحين المستشفى الحين ...
ياسمين التفتت على عمر ...
عمر : قومي يلا انا اوديج ...
قامو ياسمين وعمر راحو المستشفى بسيارة عمر .. وام ياسمين وابوها بسيارتهم ..



بالطريج ...
ياسمين كانت ساكته وخايفه ... عمر حط ايده على ايدها
عمر : لا تخافين ... مافيه شي انشالله لا تحاتين ...
طالعته ياسمين وماقالت شي ... وصلو المستشفى وراحو حق بدر ...
بدر كان قاعد ومنزل راسه... التفت لقى ياسمين يايه مع عمر .

البارت الثالث عشر

بدر كان قاعد ومنزل راسه ... التفت لقى ياسمين يايه مع عمر ...
ياسمين اول ما شافته راحت بسرعه
ياسمين : اشفيه خلود ؟؟؟
بدر : ما فيه شي قاعد عالقنفه وزلق وطاح
ياسمين : تعور ؟
بدر : لا بس ايده عورته ويبته ... طلعت مكسوره وبيحطوله جبس الحين
يا عمر وقف يم ياسمين
عمر : بو خالد شلونك ؟
بدر : بخير الله يسلمك
عمر : وين خلود عيل
بدر : كا الحين يطلعونه ( رد نزل راسه )




طلع الدكتور وشايل خلود الي عينه حمر متروسه دموع
راحت ياسمين خذته من الدكتور : حبيبي تعورت ؟
الدكتور : مافيه شي انشالله الكسر مو قوي وكلها جم يوم ويرد مثل قبل واحسن بعد ... صح يا بطل ؟؟
خلود يطالع الدكتور وما تحجى
ياسمين : مشكور دكتور ما قصرت
الدكتور : العفو ما سويت شي ... ديربالكم عليه
وصلو ام وابو ياسمين ...
بو ياسمين : ها يبا بدر شلونك ؟
بدر : هلا عمي ( باس راسه اهوه وام ياسمين )
ام ياسمين : كاهو خلووودي مافيه شي حبيبي خرعتونا
بدر : لا بس ايده انكسرت ويقول الدكتور مو كسر قوي
بو ياسمين : زين اشوه الحمدلله
ياسمين (طالعت بدر): انا باخذه معاي البيت
بدر طالعها وما قال شي
بو ياسمين : ليش يبا تاخذينه ؟ اليوم المفروض يكون عند ابوه
ياسمين : اي بس...
عمر : ياسمين ! كلها جم يوم الي بدر يشوف خلود فيها بتاخذينه منه بعد ؟ خليه عند ابوه
ياسمين : اي بس ايده...
عمر : ترا بدر ابوه ! بيخاف عليه مثل ما انتي خايفه عليه
ياسمين عطت خلود حق بدر وطالعت عمر..
ياسمين : انا رايحه السياره
بو ياسمين : يلا كلنا نمشي دام خلود بخير الحمدلله... ديربالك عليه بدر
بدر : انشالله عمي
مشو كلهم...
بدر : عمر ...
عمر : هلا ؟
بدر : مشكور
عمر : العفو ما سويت شي ... بو خالد قبل لا امشي ... انا وياسمين بنسافر.. عادي ناخذ خلود ولا تبي تخليه عندك ؟
بدر : وعقب طيحته هذي امه بتخليه عندي على ما تردون ؟
عمر : ما عليك من امه ... انت شنو تبي ؟
بدر : خلوه عندي وروحو ومتى ما رديتو قولولي اييبه
عمر : على خير ... فمان الله



راح عمر ولقى ياسمين ناطرته بره
عمر : يلا امشي
راحت ياسمين وراه وركبت السياره بدون ما تقول شي ....

بالطريج ...
عمر : اشفيج ؟ كا خلود اسم الله عليه مافيه شي
ياسمين : انا مو عن خلود ... عنك انت ! ليش ما خليتني اخذه ؟
عمر : ياسمين ترا اهوه ابوه !!
ياسمين : اوكي اهوه طاح واهوه عند ابوه !
عمر : انتو ليش حاطين ابالكم انه الرياييل ما يخافون على عيالهم كثركم ؟ ترا ولده ! ولده العود بعد !! ومو قاعد يشوفه الا يومين بالاسبوع ! خفي عليه شوي



ياسمين استغربت من رد عمر بس سكتت ما علقت ....

عمر : على فكره لما نسافر بدر بيخلي خلود عنده
ياسمين : كلمته ؟
عمر : اي... وقال خلوه عندي ولما تردون ارده لكم

وصلو ياسمين وعمر البيت... نزلت ياسمين بسرعه وراحت فوق ...
دش عمر ورا ياسمين الغرفه...
عمر : زعلانه ؟
ياسمين : ......
عمر : ما تبين تكلميني ؟
ياسمين : يعني صرخت عليي جدامه ما قلت شي .. بس تتفق معاه من وراي انك تعطيه ولدي اسبوعين بدون ما تقولي
عمر : مو تكلمنا بهالموضوع من قبل وقلنا اذا بدر ما رضى ناخذه راح نخليه عنده
ياسمين : اي اوكي بس مو انته تكلمه ومن وراي بعد
عمر : اوووو ياسمين لا تاذيني !!
ياسمين : ماني ماذيتك ولا شي انته الي ياي تسال
عمر : اففففف
طلع من البيت وخلاها ...






بدر عقب ما طلع من المستشفى كان حده متضايق ... خذا خلود وراح البحر قعد وخله خلود يقعد جدامه يلعب ...

دق على بدر واحد من ربعه وقاعد يكلمه وخلود يلعب ....
خلص بدر من التلفون التفت لقى وحده قاعده تلعب مع خلود ...
طالعها بدر وسكت ما قال شي ... اهيه شافته ابتسمت
البنت : ولدك ؟
بدر : اي
البنت : شسمه
بدر : خالد
البنيه باست خلود : الله يخليه لك يهبل اسمالله عليه
بدر ( ابتسم ) : تسلمين



قامت البنيه وقفت
بدر : يلا خلود بابا نروح ؟
خلود قام وراح حق بدر
بدر : حبيبي فيك النوم
البنيه : اي مبين دايخ ... خلودي فيك النوم ؟
خلود : اي
البنيه : ووووي حلاته ... يلا روح البيت نام ... باااي
خلود : باااي
راح بدر البيت ونوم خلود عنده بالغرفه ما حطه بغرفته ونام يمه ....



عند عمر وياسمين ...
رد عمر البيت لقى ياسمين قاعده تطالع التلفزيون مو نايمه
عمر : السلام
ياسمين : وعليكم السلام
عمر : ليش مو نايمه ؟ بتقنعيني ناطرتني ؟
ياسمين : لا بس الفلم حلو وناطرته يخلص


وقف عمر جدامها يخزها
طالعته ياسمين يعني معصبه ... شافت ويهه ما قدرت تسكت وقامت تضحك
عمر : ناطره الفلم يخلص ها ؟
ياسمين : ههههههه اي
عمر : زين ياسمينو انا اعلمج !
ياسمين : ههههه تعال تعال اتغشمر والله
عمر : مابي مابي روحي
دش عمر الغرفه وراحت وراه ياسمين
عمر : شتبين ؟ روحي كملي الفلم بروحج
ياسمين : اخاف
عمر : نعم ؟
ياسمين : الفلم يخرع اخاف اطالعه بروحي
عمر : الحين مو من مساع قاعده تطالعينه بروحج ؟
ياسمين : اي كنت مغمضه
عمر : ياسمينو طلعي نامي بره
ياسمين : هههههه عمر خلاص عااااد
عمر : احسن عشان اتوبين
ياسمين : خلاص توبه والله ( راحت باسته )
عمر : روحي سكري التلفزيون وتعالي نامي
ياسمين : ههه اوكي



راحت ياسمين سكرت التلفزيون وانسدحت يمه
شوي ...
ياسمين : عمووور
عمر : هممم
ياسمين : عمررررررر
عمر : شتبيييييين
ياسمين : قولي قصه
عمر : انتي اشفيج اليوم ؟
ياسمين : مو يايني النوم
عمر : ياسمينو نامي لا اسويج انتي قصه الحين
ياسمين : هههه يعني مو زعلان ؟
عمر : لا بس خليني انام عفيه
ياسمين : اكيد اكيد ؟
عمر : اكيد اكيد
ياسمين : زين يلا قولي قصه
قام عمر وطقها بالمخده
ياسمين : هههه عمور عورتني
عمر : احسن ! نامي يلا
ياسمين : زين زين مليق



ثاني يوم قامت ياسمين وما لقت عمر يمها ...
طلعت تشوفه بالبيت ما لقت احد ... طلت من الدريشه سيارته مو موجوده ....
دقت عليه ما رد ....
نطرت نص ساعه وردت دقت مره ثانيه ...
عمر : الوو
ياسمين : عموري وينك ؟
عمر : ياسمين ...
ياسمين : اشفيك ؟
عمر : امي بالمستشفى .

البارت الرابع عشر

عمر : امي بالمستشفى...
ياسمين : شنو ؟ ليش اشفيها ؟
عمر : السكر مرتفع شوي وطاحت ... دقو عليي الصبح مبجر كنتي نايمه ما حبيت اقعدج
ياسمين : اي مستشفى ؟
عمر : لا تيين مو لازم ...
ياسمين : بينومونها ؟
عمر : بس اليوم وباجر تطلع
ياسمين : على خير ... طمني اوكي ؟
عمر : اوكي ... باي

عقب ما طلع الدكتور من غرفة ام عمر وطمنوه عليها ... راح عمر قعد عندها ....

عمر : يما الله يهداج جم مره قلنالج تديرين بالج عل نفسج وصحتج ؟
ام عمر : صحتي ؟ وليش اهتم بصحتي وولدي قاصه عليه بنت ابليس وصايره ماشوف الا بالسنه حسنه !
عمر : يما الله يهداج شهالحجي ؟
ام عمر : بعد هذا الصج ! تيي دقيقتين وتمشي
عمر : يما انتي ما تقصرين بياسمين .. تطبين فيها جدامي .. مرتي ما ارضى عليها
ام عمر : ماخذها وانا مو راضيه .. تبيني احبها بعد ؟
عمر : اهدي انتي الحين ولما تطلعين يصير خير
ام عمر : ابيك تسكن عندي بالبيت !
عمر : وياسمين وولدها ؟؟
ام عمر : انا مالي شغل فيهم انا ابي ولدي عندي
عمر : لا حول ولا قوة الا بالله !!
ام عمر : اي اكيد ما يعجبك كلامي ما ترضى عليها ... ساحرتك ساحرتك !!
عمر : يما اهدي مو زين عليج !!
ام عمر : بسكت بسكت ...

عقب جم ساعه رد عمر البيت وحده ماله خلق احد...

ياسمين : ها عمر شلون خالتي ؟
عمر : بخير
ياسمين : اشفيك ؟
عمر : مافيني شي
ياسمين : عمر خالتي فيها شي ؟
عمر : اووو ياسمين قلتلج ما فيها شي
ياسمين : عمر اشفيك ما قلتلك شي انا
عمر : اففففففففففففففف
صعد عمر الغرفه وحط راسه ونام ...

قام عمر عقب جم ساعه وراح حق امه على طول المستشفى وقعد عندها لي الليل ...
رد البيت متاخر ولقى ياسمين نايمه ... راح قعد بالصاله طالع تلفزيون شوي ونام بالصاله

قامت ياسمين الصبح ما لقته يمها ... طلعت شافته بالصاله ...
ياسمين : عمرر .. عمووور
عمر : هممم
ياسمين : ليش نايم اهني حبيبي ؟
عمر : مادري غفيت ... سويلي ريوق بتريق واروح
ياسمين : تروح حق خالتي ؟
عمر : اي .. اليوم تطلع
ياسمين : ايي معاك ؟
عمر : لا مو لازم..
ياسمين : بس عمر فشله مارحت امس ولا اليوم اروح
عمر : بعدين ياسمين ... سوي الريوق على ما اتسبح بطلع بسرعه
ياسمين : اوكي

راحت ياسمين سوت ريوق وحطته عالطاوله... طلع عمر من الشاور كلا عالسريع وشرب عصير وطلع .....



عند بدر ....

خالد : بابا .... بابا
ما قام بدر ....
قام خالد وحط ايده بحلج بدر ... فز بدر من النوم بسرعه
بدر : بابا خلود شنو هذا ؟
خالد قام يضحك
بدر : تضحك ها ؟
وقام بدر يسوي روحه بيطقه وخلود قاعد يضحك
بدر : يلا بابا شنو تبي ريوق ؟
خالد : فلون فيييه
بدر : شنو ؟
خالد : فلووون فييييه
بدر : شيطلع هذا بعد ؟؟
خالد : ماما تحطه مع الحليب
بدر : حليب ؟ خلود يعني كورن فليكس ؟
خالد : ايي
بدر : ههههههه قوم قوم غسل خل اناديلك الخدامه



راح خلود ناده الخدامه غسلت بدور ولبسته وقعد بدر يتريق معاه..
خالد : بابا خنروح البحر اليوم
بدر : البحر ؟
خالد : ايي
بدر : خلاص بس مو الحين العصر اوديك اوكي ؟
خالد : ايييي

عند عمر .....

عمر طلع امه من المستشفى وراحو البيت...
نوره : تو ما نور البيت يما ... والله امس صج احسه ظلمه وانتي مو اهني
ام عمر : اي نور لانه عمر معاي ...
عمر طالعها وما قال شي ...
ام عمر : يما تبي تاكل شي ؟ شتبي تتغدا
عمر : لا لا برد بيتنا
ام عمر : ليش يما ؟
عمر : ياسمين بروحها اهناك
ام عمر : تعرف تاكل بروحها لا تخاف مو محتاجتك توكلها
عمر : ادق عليها عيل تيي اهني اهيه كانت تبي تشوفج من امس
ام عمر : اذا جذي عيل روح عيل مو لازم تاكل عندنا
عمر : استغفرالله .. خلاص يبا بتغدا اهني
دز عمر مسج حق ياسمين انه بيتغدا عند امه وقالها تروح عند امها اذا تبي...
ياسمين بدلت هدومها وراحت بيت اهلها ...

العصر بدر خذا خلود وراحو البحر ...
بدر قاعد يلعب مع خلود ...
بدر : ها بابا مستانس ؟
خلود : اييي
بدر : وين تبينا نروح بعدين ؟
خلود : بيت ماما عوده
بدر : خلاص نخلص من اهني نروح نسبحك وبعدين نروح بيت ماما عوده زين ؟
خلود : اييي
....: خلووود هاااي
التفت بدر لقى نفس البنيه الي شافوها امس
البنيه طالعت بدر ابتسمت وبدر ابتسملها وراحت يم خلود
البنت : خلووود شلونك ليش ما تحاجيني ؟
خلود : هاج
البنت : شنو هذي ؟
خلود : دوده
البنت : ههه مو دوده هذي صخره
خلود طالعها وضحك.... البنيه كانت رافعه شعرها
خلود : مو حلو شعرج جذي
البنت : ليش مو حلو ؟
خلود : نفس امس احلى
البنت : افله يعني ؟
خلود : اي يصير طويل
فلت البنيه شعرها : جذي اوكي ؟
خلود : ايي ( قرب منها خلود و قعد يسوي روحه يعدله حقها )
بدر : بس بابا خلود
البنت : ههه لا عادي خله ...
خلود : انتي شسمج ؟
البنت : انا اسمي نور

دق تلفون بدر ... كانت ام ياسمين الي داقه
بدر : الوو هلا عمتي ...
ام ياسمين : ها بدر شلونك يما ؟
بدر : بخير الله يسلمج
ام ياسمين : شلون خلود الحين ؟
بدر : بخير كاهو قاعد يلعب مافيه شي
ام ياسمين : امه تبي تكلمه تتطمن عليه
بدر : نطري اعطيه التلفون... خلود بابا امسك
خلود : الووو
ام ياسمين : خلودي شلونك ؟
خلود : انا زين
ام ياسمين : تبي تكلم ماما ؟
خلود : وين ماما
ام ياسمين : كاهي حبيبي
ياسمين : ها حبيبي .. شلونك مستانس ؟
خلود : ايي
ياسمين : ايدك تعورك حبيبي ؟
خلود : شويه تعورني بعدين ما تعورني
ياسمين : ما تعورك الحين ؟
خلود : اي
ياسمين : خلاص يلا حبيبي اشوفك باجر انزين ؟
خلود : انزين
ياسمين : يلا باي
خلود : باي
خذا بدر التلفون من خلود وسكره.. وكانت نور ليلحين موجوده تلعب بالرمل مع خلود
خلود : بابا اروح حق ماما باجر ؟
بدر : اي بابا ( التفت على نور لقاها قاعده تطالعه )
نور : سوري ادري لقافه بس ...
بدر : هه لا عادي .. انا وامه متطلقين صارلنا جم شهر ...
نور : وخلود معاك ؟
بدر : لا بس ويك اند
نور : اها .... اسفه تدخلت بحياتك شوي
بدر : لا عادي .. انا من طلقت امه ومحد قام اييب طاريها جدامي .. عمري ما تحجيت عن الموضوع ... انتي اول وحده تتجرأين وتفتحين الموضوع
نور : ليش ؟ اهلك ما كانو راضين تطلقها ؟
بدر : ما يدرون ليش تطلقنا
نور : اقدر اعرف ليش ولا جني تليقفت وايد ؟
بدر : هههه لا ما تليقفتي وايد .. بس اذا عرفتي ليش قوليلي
نور : اممم مبين حياتك لويه
بدر : ااااخ حده ...
نور : جنه خلود مل ؟
بدر : ها خلود .. نروح البيت ؟
خلود : لا ابي العب شويه
نور : ههه حلاته ... اخذه البيت مبين تعب وحران
بدر : اي الجو حار اليوم .. يلا بابا قوم
قام خلود وقف وراح حق بدر وقط نفسه عليه
بدر : وتقولي تبي تقعد ها ؟ هههه
نور : يحليله ... يلا عيل باي خلووود
بدر ابتسم ومشى وخلود قاعد يطالعها .