من تجرأ من قطف هالياسمين

من تجرأ من قطف هالياسمين

هااااي يا حلوين
شلونكم شخباركم ؟ :$
انا قلت ماني منزله قصة يديده بس ولهت عليكم :$ وهم احس المنتدى مات شوي صارله جم يوم قلت اردله الحياة :$
المهم
القصه... فكرتها الاساسيه واقعيه ... بس التفاصيل من مخي المسكين :$ الي بتعبه وايد :$
المهم ... كل يوم انشالله في بارت الا الاثنين... مو سالفة اجازة او شي بس لانه دوامي من الصبح لي المغرب !!
طبعا وشي طبيعي ما تبوني ارد واكتب قصه !
من سابع المستحيلات اسويها
والحلوين الي يقرون بصمت :$ ترا كلمة مشكوره او ناطرين ماراح تاكلكم ابدا وما تاخذ منكم غير ثانيه :$
والحلوين الي مايعجبهم شي بالقصه اتمنى يعلقون بذرابه :$ ما اقصد الكل انا اقصد البعض ! :×
واذا كلش كلش كلش ما قدرتي تمسكين نفسج الخاص موجود لوووووووول
المهم نبدي باول بارت.... ادري مو طويل بس ريريز تحن تبيني انزله الحين الحين الحين عشان تعلق عليه اول وحده :$ وبعدين هذي مجرد مقدمه :$




طالعت ويهها بالمنظره .... تتاكد من المكياج الي حطته .... تتاكد انه شعرها مثل ما كانت تبيه.... وقفت... وعدلت نفنوفها ...



حلم كل بنيه .... كل بنت تتمنى ايي هاليوم .... اليوم الي تكون فيه عروس ....
سمعت صوت من وراها ....


لين (خبيرة التجميل) : ست ياسمين ... انشالله كل شي تمام ؟؟
ياسمين : اي... تسلم ايدج .....
لين : شوو ؟ باينتك مو فرحانه
ياسمين: (تبتسم) لا كل شي تمام....
طالعت ياسمين شكلها بالمنظره اخر مره...
ياسمين ( غمضت عيونها ) : يارب يكون حلم .... يااااااارب يكون حلم
بطلت عيونها وتطالع المنظره بعين كلها حزن ومشت....
مر الوقت بسرعه على ياسمين ... ماحست بشي طول العرس ... كانت موجوده بجسمها بس مو بروحها ولا بقلبها ولا عقلها... كل تفكيرها كان بشي ثاني غير العرس ....
كانت تبتسم ... تضحك.. بس كل هالوناسه الي بويهها كانت مو صج.....
صار وقت دخلة المعرس .... ام ياسمين غطتها عدل .... وتغطو الحريم ... ودشو الرياييل...
رفعت ياسمين عينها تشوفهم واهمه داشين.... شافت ريلها ... (بدر)


بدر كان طويل... اطول واحد بين الرياييل.. لونه حنطاوي ... جسمه حلو... عيونه حلوه... كل البنات الي بالعرس ماتو عليه وعلى جماله... امه تطالعه واهوه يمشي وتقرا عليه بقلبها



قعد بدر يم ياسمين عقب ما سلمو عليه الرياييل وباركوله ومشو ... طالعها ... كانت قمة بالجمال... سمره شوي ... شعرها اسود غامج حيل .. عيونها كبار .. شفايفها متروسين شوي .. كان بدر حده مستانس ... عكس ياسمين الي كانت تتصنع الوناسه طول الوقت ....
صار وقت زفتهم... طلعو... راحو الفندق ... وياسمين ساكته... بدر عباله هالسكوت حيا وخوف لانه زواجهم كان زواج تقليدي وبفترة الملجه ماعرفو بعض عدل ...



كانت ياسمين تحس الوقت مو راضي يمشي ... الدقيقه مثل الساعه... كل شي قاعد يصير كانت تتمنى انه يكون حلم وراح تصحى منه بعدين ...
نام بدر ... وياسمين قاعده مو قادره تنام...طالعت بدر .. شافته نايم ومو حاس بشي يمه... قامت راحت تتسبح...
الماي ينزل على جسمها واهيه واقفه بدون لا تسوي شي ... فجاه .. بجت ... طلعت كل الي كانت تحس فيه ... قعدت عالارض ولمت جسمها والماي ينزل عليها واهيه تبجي ....
قعدت تبجي ليما حست نفسها ارتاحت شوي وطلعت الي فيها .... قامت غسلت عدل ولفت الفوطه على جسمها وطلعت ... لقت بدر بويهها ...
ياسمين : باسم الله ...
بدر : (بتسم) اشفيج ؟ اخرعتي ؟
ياسمين ( هزت راسها يعني اي )
بدر : ما لقيتج يمي .. ييت ادورج و..
ياسمين : مو يايني النوم .. رحت خذيتلي شور ...
بدر : فيج شي ؟
ياسمين : لا ... روح نام اسفه قعدتك...
راح بدر وقعدت ياسمين بالصاله الي بالجناح .... تفكر... ليما داخت ونامت بمكانها ...





ثاني يوم الصبح.....
بدر : ياسمين.. ياسمين !
ياسمين بطلت عيونها .. طالعت بدر وقعدت تطالع الغرفه... جنها تحاول تتذكر اهيه وين ..
بدر : ليش نايمه اهني ؟
ياسمين : مادري غفيت ..
بدر : قومي عيل غسلي وخل نتريق وعقبها نروح بيتنا وردي نامي اهناك شكلج وايد تعبانه وما نمتي عدل ....
قامت ياسمين بدون ما تقول شي ... غسلت وراحت لبست ... حطت ميك اب خفيف وراحت تتريق مع بدر .... مر الوقت بسوالف بدر ومحاولاته انه يضحكها بس اهيه كانت تبتسم وتسكت .. وكلماتها قليله .. بدر كان يحس في حاجز بينهم ومو عارف شلون يكسره...



خلصو ريوقهم .. شالو اغراضهم وراحو بيتهم ... كان البيت بيت بدر بروحه بدون اهله...
بس اهله بيتهم وايد قريب منهم... دشت ياسمين قاعده تطالع البيت... دش وراها بدر وبايده الجناط...
بدر : رااني راااااني
التفتت ياسمين تطالعه
بدر ابتسم .. ويت الخدامه : صعدي الجناط فوق...
رد التفت على ياسمين : تبين تصعدين ترتاحين ؟
ياسمين : ماراح نروح مكان ؟
بدر : بنروح بيت اهلي واهلج عشان تييبين باجي اغراضج ... بس ارتاحي اول وبعدين نروحلهم
ياسمين : اوكي.. وين الغرفه ؟
بدر : يلا امشي ..
صعدو مع بعض فوق ... دشو غرفتهم... كانت وايد كبيرة والاثاث وايد حلو ومرتب والغرفه معطره ومبخره ...
بدر : انشالله عجبتج ؟
ياسمين : اي وايد حلوه ..
بدر : يلا اخليج تاخذين راحتج انا بقعد بالصاله ..
ياسمين : اوكي ...
طلع بدر وخلاها ..
ياسمين طلعت اغراضها من الجنطه وحطتهم بالكبت ... بدلت هدومها وعدلت مكياجها وتعطرت وطلعتله...
بدر : ها ما نمتي ؟
ياسمين : لا مافيني النوم... تبي نطلع الحين ؟
بدر : اي يلا عيل نتغدا ابيت اهلي
ياسمين : اوكي.....



طلعو راحو بيت اهل بدر ... كانو وايد اهله فرحانين بييتهم... سولفو وضحكو وياسمين مثل كل مره (ساكته) ....
خلصو من الغدا وقعدو يشربون جاي وياكلون فطاير وحلو ويسولفون... وعقبها قامو عشان يروحون بيت اهل ياسمين...



بالسياره...
بدر: ياسمين فيج شي ؟
ياسمين : لا ليش ؟
بدر : مادري احسج متضايقه من شي او مو مستانسه...
ياسمين : لا شدعوه .. بس اول مره اقعد مع اهلك مو ماخذه عليهم
بدر : مو عن اهلي بس .. حتى معاي انا.. اشفيج قوليلي
ياسمين : ههه ماكو شي (ابتسمتله بدلع )
بدر التفت عليها وابتسم : كل هذا حيا ؟ بس ترا انا ريلج لي متى بتستحين يعني ؟
ياسمين ابتسمت وسكتت
وصلو بيت اهلها ... دشو داخل وشافت اختها بويهها ... ركضت لمتها وعينها دمعت..
ساره (اختها) : اوله اوله اشفيج !! ترا امس طلعتي من اهني ما صارلج سنه
ياسمين ( طقتها ) : جبي مليقه
ساره : شلونك بدر ؟
بدر : تمام الله يسلمج...
ساره : حياكم تفضلو خل اروح انادي امي ... ياسمين تدلين الصاله ولا نسيتي الطريج؟
ياسمين خزتها وبدر ضحك عليها ...
ساره : اشفيج تطالعيني جذي ؟ وييي نسيتي ! شوفي بس امشي سيده الصاله على طول بويهج
بدر ( يضحك ) : بس عاد لا تطفرينها
ساره : هههههه خل انادي امي ...



يت ام ياسمين واهيه تيبب...
ياسمين تطالع بدر وبدر قاعد يضحك...
ام ياسمين : تو ما نور البيت...
بدر : بوجودج عمتي.. شلونج ( باس راسها )
ام ياسمين: هلا يما هلا حبيبي .. انتو شلونكم انشالله مستانسين ؟
بدر : الحمدلله...
ياسمين (سلمت على امها وباست راسها ) : شلونج يما ؟
ام ياسمين : اشفيه ويهج قالب جذي ؟ بدر مزعل بنتي ؟
بدر : عمتي ما يمديني ازعلها امس عرسنا
ام ياسمين : اشفيها عيل ؟
ياسمين : مافيني شي اشفيكم علي اليوم
ام ياسمين : ما قلتولي انكم بتيون الحين ... فشله ابوج طالع
بدر : لا عادي عمتي مافيها شي
ام ياسمين : يما ياسمين جناطج كلهم محطوطين اهناك مو تنسينهم وانتي طالعه
ياسمين : اي انشالله...
ام ياسمين : عيل متى سفرتكم ؟
بدر : ليلحين ما حجزنا... قلت نقعد جم يوم اهني ونتفق بعدين وين نروح...
ياسمين: انا مابي اسافر
بدر التفت وما قال شي
ام ياسمين : ليش ؟ روحو استانسو ...
ياسمين : لا مابي ... ماحب
بدر : ماتبين تروحين اي مكان ؟ اي مكان انتي تبينه
ياسمين : لا مابي ... بقعد اهني

البارت 2


بدر : ماتبين تروحين اي مكان ؟ اي مكان انتي تبينه
ياسمين : لا مابي ... بقعد اهني
بدر التفت على ام ياسمين الي كانت تطالع ياسمين مستغربه من ردة فعلها ... رد طالع ياسمين وحط ايده على ايدها ...
بدر : على راحتج... نطلع ونستانس اهني احسن واوفر ... ولا شرايج عمتي ؟
ام ياسمين : هههه اي والله اوفر
ياسمين شوي شوي سحبت ايدها من تحت ايد بدر ولفت ويهها الصوب الثاني ...
بدر : ياسمين تبين تقعدين شوي مع اهلج ولا نمشي ؟؟
ياسمين : لا خل نمشي ... تعبانه شوي ابي ارتاح
بدر : يلا عيل .... يلا عمتي نشوفكم وقت ثاني انشالله
ام ياسمين : على خير ... ديربالك على بنتي ترا دلوعه شويه
بدر : هه بعيوني ما طلبتي شي



ياسمين قامت واهيه ساكته وراحت صوب جناطها تبي تشيل وحده منهم
بدر : خلي عنج انا اشيلهم
ياسمين : بس وايد .. اشيل الصغيره بس
بدر : روحي السياره انا اييبهم ما عليج انتي ...
راحت ياسمين السياره حطت راسها عالكشن وغمضت عيونها ... بدر دخل الجناط بالسياره وركب وصك الباب حيل .. جان تفز ياسمين
بدر : هههه اشفيج اخترعتي ؟
ياسمين : مادري ما سمعت صوتك تبطل الباب
بدر : لا انتي كلش بالج مو بالدنيا
ياسمين : لا بس تعبانه شوي
بدر : اوديج الطبيب ؟
ياسمين : لا لا ابي انام
بدر : خلاص ماشي ...




ردو بدر وياسمين البيت ... صعدت على طول غرفتها وما قالت حق بدر شي ... بدلت هدومها ونامت ...

بعد شهر ...

بدر : ياسمين ماتبين تشتغلين ؟
ياسمين : مو قاعده افكر بالشغل الحين ... ليش ؟
بدر : بس خفت تتمللين من قعدة البيت ...تدرين بعد اجازتي خلصت دوامي بيبدي من باجر وانتي بتقعدين بروحج الصبح....
ياسمين : لا عادي .. اقعد اشوف شغل البيت مع الخدامه او اروح عند امي اقعد عندها اتسلى
بدر : خلاص على راحتج.. بس متى ما تبين تتوظفين قوليلي اودي اوراقج
ياسمين : اممم ( وسكتت )

ثاني يوم.... بدر راح الدوام الصبح وكانت ياسمين نايمه ... ورد البيت عالساعه 2...
دش البيت وصعد فوق على طول... لقى التلفزيون بالصاله فوق مبطل بس ماكو احد... دش الغرفه ما لقى ياسمين موجوده.... طلع من الغرفه وقام يناديها !
بدر : ياسميييييييييييين ... ياسمييييين !
سمع صوت من تحت...
ياسمين : كاني بدرررر بالمطبخ
راحلها بدر المطبخ لقاها تارسه المطبخ طحين !
بدر : شقاعده تسوين ؟
ياسمين : كنت بسوي كيكه وعفست الدنيا
بدر : ههههه وليش ما قلتي حق الخدامه تسويها ؟؟؟ اهيه تعرف تسوي كل شي
ياسمين : مادري قلت بجرب
بدر طالعها واهوه يضحك
ياسمين : اشفيك تضحك ؟؟؟
بدر : فيج طحين على خشمج !
ياسمين التفتت تطالع ويهها وكان شكلها حده يضحك... ضحكت عالخفيف وردت التفتت عليه
ياسمين : سخيف ما يضحك
بدر : اذا ما يضحك شحقه ضحكتي ؟
ياسمين : ههه ( قربت منه وحطت ايدها على ويهها وترسته طحين )
بدر : لااااا ! ههههه ( مسكها وخذا ايدها بيحطها على ويهها واهيه تصارخ )
مسكها بدر حيل ودزها صوب الطاوله ...
بدر : قولي توبه ما اعيدها !!
ياسمين : هههه مابي !!
بدر : قولي توبه ولا ما اهدج !
ياسمين : ماراح اقول ...
بدر : قووووولي
ياسمين : اااااااي بدر عورت ايدي



بدر خاف ووخر عنها بسرعه... التفتت عليه طلعت لسانها وركضت فوق
راح وراها بدر ومسكها بالصاله الي فوق قبل لا توصل الغرفه ... قطها عالقنفه وماسك ايدها
بدر : قولي توبه ولا ما اهدج
ياسمين : ههههههه ماراح اقول
بدر : خلصيني يوعان بروح اكل !
ياسمين : ماااااااكو
بدر : والله اكلج انتي !
ياسمين : ماراح اقول هههه
بدر حط راسه على بطنها ويسوي روحه يعضها واهيه قاعده تضحك ...
ياسمين : توبه توبه خلاص
قام بدر واهوه يضحك ابتسمتله ياسمين وقامت وخرت عنه بسرعه
استغرب بدر منها ليش قامت بسرعه جذي واهيه توها كانت قاعده تضحك ... راح بدل هدومه ونزل تحت عشان يتغدا لقاها قاعده ناطرته...

بدر طالعها وابتسم : شنو غدانا اليوم ؟
ياسمين : مجبوس هامور
بدر : ههه شنو ؟
ياسمين : مجبووس هاموووور اشفيك ؟
بدر : مجبوس هامور غلط ! مطبق هامور صح !
ياسمين طالعته جنها ياهل وما قالت شي
بدر : اشفيج تطالعيني جذي
ياسمين : اسمه مجبوس
بدر : صدقيني مطبق
ياسمين : لا صج عاد ؟
بدر : كيفج لا تصدقين
ياسمين : بدوووور يالمليق !
بدر التفتت وابتسم : شنو قلتي ؟
ياسمين : قلت مجبوس هامور
بدر : مو عن المجبوس اتحجى ! ردي قولي بدور اول مره تدلعيني
ياسمين : ههه اكل اكل بس



عقب شهرين.. بدر كان توه راد من الدوام .. ولقى ياسمين قاعده تحت وويها متغير
بدر : السلام
ياسمين : وعليكم السلام .. تبي غدا ؟
بدر : اي بس اشفيج ؟
ياسمين : مافيني شي ..
قامت ومسكها بدر ...
بدر : قوليلي اشفيج !
ياسمين : انا حامل
بدر طالعها وما عرف شيقول : صج ؟
ياسمين : امممم
بدر : رحتي فحصتي اليوم ؟ ما قلتيلي !
ياسمين : لا .. خذيت اختبار حمل من الصيدليه
بدر : خلاص عيل باجر الصبح نروح المستشفى احسن
ياسمين : ودوامك ؟
بدر : الدوام لله ... انتي اهم
باس راسها وراح فوق يبدل ...
ياسمين راحت تعدل طاولة الاكل ودمعت عينها ... مسحت دموعها بسرعه عشان مايشوفها بدر....




ياسمين خلصت غداها وصعدت فوق ترتاح .. راح بدر لقاها منسدحه عالفراش .. اول ما شافته لفت ويهها الصوب الثاني وغمضت عيونها
راحلها بدر ولمها من ورا وقعد يلعب بشعرها ...
بدر : اشفيج ؟
ياسمين : مافيني شي
بدر : ليش احسج متضايقه ؟
ماردت عليه ..
بدر : ياسمين اشفيج ؟ مو مستانسه انج حامل ؟
ياسمين : خايفه
بدر : من شنو ؟
ياسمين : مادري...
بدر : لا تخافين من شي ... انا معاج وبحميج من الاشرار
ياسمين ضحككت ولفت تطالعه
لمها بدر وحط راسها على صدره ونام ...
ياسمين نطرته ينام وراحت الحمام بسرعه .... بطلت الشاور وقعدت تبجي ...
قام بدر من النوم عقب ساعتين ولقى ياسمين قاعده بالصاله ...
ياسمين : ها قعدت
بدر : اممم... ( راح قعد يمها )
ياسمين : ههه اشفيك متنح جذي
بدر : فيني النوم
ياسمين : شحقه قعدت عيل ؟ جان كملت نومتك
بدر : لا مابي .. باخذج نتمشى بره
ياسمين : لا لا مالي خلق
بدر : امشي غيري جو.. ما مليتي من قعدة البيت ؟؟؟؟
ياسمين : لا بدر مابي ماحب
بدر : ياسمين انتي اشفيج ؟ كله مابي وكله ماحب ... من تزوجنا ما طلعتي معاي الا جم مره وينعدون عالاصابع !
ياسمين ما ردت عليه...



بدر : ردي علي لا تطالعيني جذي !!! اشفيج قوليلي اشفيج ؟ في شي مو عاجبج ناقصج شي ؟؟ اول ما تزوجنا قلت يمكن مستحيه وما تعودت عليي بس الحين صارلنا شكثر مع بعض ؟؟؟ ترا مليت من طبعج وسكوتج وبرودج معاي !!!!
ياسمين ما ردت عليه تطالعه مصدومه اول مره يكلمها جذي ...
بدر : ماراح تردين صح ؟؟؟ انا اطلع احسن ...
راح غرفته لبس دشداشه وطلع من البيت ...
ياسمين قعدت بمكانها فتره مصدومه من الي صار ... ما توقعت بدر بينفجر بويهها جذي ... لانه كان دايما ساكت ومسوي روحه مو مهتم وعادي عنده ...
راحت غرفتها قطت روحها عالفراش وقامت تبجي .... نطرت ساعتين ودقت على بدر وما رد عليها ...
قعدت تنطره طول اليوم مارد ... دقت عليه وهم ما رد عليها .... صارت الساعه 12 واهوه ليلحين ما رد البيت .. وهذي اول مره تصير ...
صارت مثل المينونه تروح وترد عالدريشه تشوفه رد ولا لا ..... لما شافت سيارته راحت انسدحت عالفراش....
دش بدر الغرفه وراحلها
بدر : ياسمين... قومي ادري انج مو نايمه

اطول من جذي ماكو !!! ومو كل مره بكتب بارت هالطول بس اليوم نزل الالهام فجاه لا تتعودون اوكي !! :×

البارت الثالث

قامت طالعته وماقالت شي
بدر : اسف لاني صرخت عليج ما كنت اقصد و....
دمعت عيونها وقامت تشاهق
بدر : لا تبجين خلاص ... اسف
لمها وباس راسها ....
بدر : باجر نروح المستشفى حق الفحص اوكي ؟
ياسمين هزت راسها وما قالت شي ..
بدر : يلا عاد ضحكي !!
ياسمين ( ابتسمت ووخرت عنه ) : نام اكيد دايخ الحين
بدر : مو زعلانه ؟
ياسمين : لا
بدر : اكيد ؟
ياسمين : اي... يلا نام
بدر : تعالي
نومها على ايده ونام اهوه بعد
قامو اثنينهم من النوم عالساعه 9 قامو تريقو ولبسو وراحو يفحصون... تاكدو انها حامل وبدر كان وايد طاير من الفرحه ....
بالطريج..
بدر : ها وين تبينا نتغدا ؟
ياسمين : نتغدا بره ؟
بدر : اي ... تغيير
ياسمين : بس ......
بدر : بس شنو ؟!
ياسمين : قلت حق الخدامه تسوي غدا ... خل ادق اقولها ما تسوي شي ...
بدر : زين ما قلتيلي وين نتغدا
ياسمين : اممممممم شرايك ماكي ؟
بدر : ماحبه !
ياسمين : انا احبه
بدر : بتبدين دلع عشان حامل صح ؟
ياسمين : هههه اي
بدر : الله يعيني عيل ... ماكي ماكي
راحو المطعم وقامو ياكلون وبدر كان كل شوي يوكل ياسمين واهيه تضحك ومستانسه...


بعد اسبوعين ( ويك اند ) ... قاعدين يطالعون تلفزيون مع بعض ... وطلع مشهد بالفلم واحد ماسك حلاوه تشوباتشوبز بايده ....
ياسمين : الله
بدر : اشفيج ؟
ياسمين : ابي حلاوه
بدر : نعم ؟ ياهل انتي
ياسمين : بدوور الله يخليك بخاطري
بدر : خلاص باجر اييبلج
ياسمين : لا ابي الحين
بدر : ياسميين ! الساعه 12 ونص !
ياسمين ( عفست ويهها ) : خلاص انزين
سكت بدر شوي ورد التفت عليها ....
بدر : طاح حظ الي يزعلج زين !!! رايح اييبلج حلاوه
قام وحذفها بالمخده الي بايده وراح ....
رد عقب ربع ساعه ويايبلها انواع وايد ....
ياسمين : اوله اوله شنو هذا ؟
بدر : عشان ما تقولين بعدين تبين شي ثاني بعد
ياسمين : هههه تسلملي ... بدر باجر بروح بيت اهلي
بدر : متى ؟
ياسمين : امممم مادري عقب الغدا بروح اقعد عندهم لي الليل
بدر : خلاص الي يريحج...
ياسمين : ماتبي تنام ؟
بدر : لا مو يايني النوم.. روحي انتي شكلج تعبانه
ياسمين : اوكي... تصبح على خير
بدر : وانتي من اهله

ثاني يوم كان يومهم حده عادي وتغدو مع بعض وعقبها راحت ياسمين لبست وراحت بيت اهلها ....
ام ياسمين : ها يما ... شلون ريلج ؟
ياسمين : تمام الحمدلله
ام ياسمين : كل شي تمام ؟ مافيكم شي ؟
ياسمين : لا الحمدلله
ام ياسمين : وشلونج مع الحمال ؟
ياسمين : مادري عادي ... النساة مأذيتني شوي
ام ياسمين : اي لازم بعد ...
ياسمين : وين ساره عيل ؟
ام ياسمين : بغرفتها .. روحي شوفيها انا بقوم البس بنروح حق يارتنا توها طالعه من المستشفى .. ماراح اطول
ياسمين : اوكي


راحت ياسمين غرفة ساره لقتها قاعده تسوي شعرها ...
ياسمين : السلاام
ساره : اهلييين .. من متى انتي اهني
ياسمين : توني ما صارلي وايد
ساره : يلا متى يطلعلج بطن؟؟ مليت ترا
ياسمين : ههه سارووو اخر مره شفتيني الاسبوع الي طاف تبين يطلعلي بطن بسرعه جذي ؟ ترا توني داشه الثالث !!
ساره : ههه شلون بدر ؟
ياسمين : زيين
ساره : مستانسه معاه؟؟
ياسمين (نزلت راسها ) : اممم
ساره : ياسمينووو ليلحين ما نسيتي ؟؟
ياسمين : في احد ينسى روحه ؟
ساره : خلاص انتي متزوجه الحين انسيه !
ياسمين : ساره ولهانه علييه حسي فيني !
ساره : صارلج اكثر من سنه ما تدرين عنه وينه ! وتدقين كله مغلق ! شتبين اكثر من جذي بعد ؟
ياسمين : مادري ساره شلون اختفى جذي فجاه وليش سوا فيني جذي !
ساره : هفففففف انسي انسي خلاص !!! انتي على ذمة ريال الحين حرام عليج الي قاعده تسوينه !!
ياسمين : احبه
ساره : لو يحبج مايخليج
ياسمين : ساره انتي موحاسه فيني ! والله احس جني مسكونه ! احسه طول الوقت معاي ! وين ما اروح اتخيله ! ساعات اطالع بدر اشوف ملامحه فيه !! ساعات تمر ريحته علي لا تسالينيي شلون !! خلاص انا قربت استخف ! بعرف وينه وليش خلاني !
ساره : مو مهم وينه ومو مهم ليش خلاج !! المهم انه الي عندج الحين ماكو منه اثنين بالدنيا !! لا تضيعينه من ايدج !!
ياسمين : قاعده احاول ..

بالليل ردت ياسمين البيت ودشت الغرفه... لقت بدر قاعد عالفراش وبايده التلفون.. اول ما شافها رفع راسه وابتسم..
بدر : توني بدق عليج بسالج متى تردين ..
رن تلفونها رنه وتسكر ... طالعته وضحكت
ياسمين : اي حسيت انك ولهان عليي ورديتلك بسرعه
بدر : هههه
راحتله ياسمين ولمته...
بدر : اشفيج ؟
ياسمين : ولهانه عليك... مايصير ؟
بدر : هههه دووووم !!
ياسمين طقته ودزته : ليش يعني ؟
بدر : اول مره تيين بروحج وتلميني ... اذا ولهانه عليي لميتيني جذي عيل بخليج شهور وارد بشوف شتسوين
ياسمين : بدر !! لا تقول جذي ! والله ازعل
بدر : اتغشمر شدعوه اشفيج... تعشيتي ؟
ياسمين : اي وانته ؟
بدر : لا بروح عند الربع بالدوانيه اتعشى اهناك
ياسمين : خلاص اوكي
بدر : تبين شي قبل لا اطلع ؟
ياسمين : لا سلامتك
بدر : الله يسلمج.. اذا تبين شي دقي
ياسمين : اوكي.. ديربالك بالطريج
بدر : انشالله .. باي
ياسمين : الله معاك

بعد شهر .... قاعدين العصر يسولفون وياسمين كانت مسويه كيكه ويايبتها حق بدر يعطيها رايه
بدر : لحظه لحظه ما تجربينها قبلي
ياسمين : بشوفها حلوه ولا لا
بدر : اول انا
وقصله من الكيكه شوي وكلاها
بدر : اممممم حلوه
ياسمين : صج ؟
بدر : ايي
ياسمين : يلا باكل
بدر : ماكو !! كلها حقي
ياسمين : عن الملاقه بجرب
قامت قصتلها شوي وكلته
ياسمين : الله يزيد النعمه ... امبييييه شنو هذا !! حده المفروض ما تطلع جذي... استغفرالله...
بدر : هههههههههههههه طالع ويهج شلون قلب
ياسمين : شلون تقولي حلوه انته ؟
بدر : مابي ادقرج.. اخاف ما تدشين المطبخ كلش مره ثانيه
ياسمين : بعد عقب هالكيكه تبيني ادش المطبخ ؟ ناوي تتسم انته ؟؟
بدر : هههه خلج من الكيكه.... قوليلي شنو قالتلج الدكتوره ؟
ياسمين : عن شنو ؟
بدر : ولد ولا بنت ؟
ياسمين : قلتلك ماراح اقولك !!
بدر : خلصي يالمليقه
ياسمين : شتعطيني ؟؟
بدر : لج الي تبينه بس قولي !!
ياسمين : بنت
بدر : صج ؟
ياسمين : استانست ؟؟ ما ضاق خلقك انها بنت ؟
بدر : ايييي اكيد بستانس ليش يضيق خلقي؟ اليهال نعمه ... وبعدين مو يقولون البنت تاخذ قلب ابوها ؟ انتي الي المفروض تتضايقين مو انا
ياسمين : لا والله ؟؟
بدر : ايي !!
ياسمين : عيل ابشرك ! ولد مو بنت !! كنت بشوف ردة فعلك
بدر : ههههه صج ؟
ياسمين : اي !!
بدر : انزين شتبين تسمينه ؟
ياسمين : ما تبي تسميه انته ؟
بدر : لا ... بخليه على ذوقج ...
ياسمين سكتت شوي وبعدين ردت : بسميه خالد..

سرحت ياسمين شوي ... وقعدت تتذكر....
...: حبيبتي شتبين نسمي عيالنا ؟
ياسمين : ههه عيالنا عاد.. ليش جم واحد بنييب ؟
....: 10 صبيان و10 بنات
ياسمين : هذول كلهم منو اييبهم ؟ انا بروحي ؟
...: بروحج شلون ؟ انا وياج !
ياسمين : لالالا 20 عاد ؟ بصير بطه وجسمي يخترب
...: ويعني ؟! ماراح يتغير مكانج عندي
ياسمين : هههه
...: يلا شتبين تسمين ولدنا العود ؟!
ياسمين : نسمييه اممممم..........


بدر : ياسمييييين !!! قاعد احاجيج اشفيج !!
ياسمين ( فزت ) : شنو .. مادري ما سمعتك
بدر : فيج شي ؟؟! تعبانه ؟؟
ياسمين : لا سرحت شوي ... خل اودي الكيكه المطبخ اشوف الخدامه تقدر تاكلها ولا تنقط

مرت 5 شهور وكانت ياسمين تحاول تغير نفسها عشان خاطر بدر ... قامت تسولف معاه اكثر وتطلع معاه ... تضحك وتتغشمر حدها غيرت معاملتها معاه...
صار موعد ولادتها ... وداها بدر المستشفى وظل اهناك وكان حده خايف ... ابو ياسمين كان قاعد يمه ويحاول يسولف معاه ويهديه بس بدر ما كان باله مع احد الا مع ياسمين ...
ولدت ياسمين ... ويابت ولد .. الكل فرح واستانس ... بس ياسمين كانت عيونها متفوخه وحمره من البجي ....
بدر : الحمدلله على سلامتج حبيبتي
ياسمين : الله يسلمك
بدر : اشفيها عيونج ؟ ليش تبجين ؟؟
ياسمين : تعبانه شوي مافيني شي لا تحاتي
بدر : يلا عيل انا بروح اييب امي ماعندها احد اييبها
ياسمين : اوكي ديربالك
بدر : انشالله .. باي
فضت الغرفه مافيها الا ياسمين وساره....
ساره: عدلي ويهج عدليييه !! ميته من البجي مادري على شنو !!
ياسمين : ساره بس
ساره : ليش تسكتيني ؟ شوفي بدر شلون طاير من الفرحه ! وانتي الي قدرتي عليه انج تقولين المفروض هذاك يكون معاج اليوم !!
دشت ام ياسمين ...
ام ياسمين : اشفيكم شهالصراخ ؟!
ياسمين : مافينا شي...
ام ياسمين : ساره شقايله حق اختج ؟
ساره: قلتلها تتكحل شوي خرعت ريلها بويهها
ام ياسمين : توها والده وينها وين الكحل ! يوزي عن البنيه بس !
رد بدر ومعاه امه باركتلها وقعدت معاهم شوي ومشو كلهم الا بدر...
ياسمين : ماراح ترد البيت ؟
بدر : لا ... بنام عندج
ياسمين : وين بتنام ؟
بدر : عالقنفه اهني
ياسمين : اخاف ما ترتاح
بدر : ميخالف .... ماعتقد انتي كنتي مرتاحه بعد وانتي تولدين
ياسمين : هههه يعني عشان نصير متساوين ؟!
بدر : اي... عشان لما يكبر ولدنا ما تقوليله انا ولدتك وتعبت فيك ... حتى انا تعبت ترا ونمت اهني وظهري بيتكسر بعد
ياسمين : هههه الله لا يحرمني منك...
قرب بدر باس راسها وراح انسدح عالقنفه...

البارت الرابع



راحت ياسمين بيت اهلها عقب يومين ... وقعدت بغرفة ابيتهم تحت ... وكان بدر كل يوم المغرب يروحلها ويقعد عندها ثلاث ساعات كل يوم.....

عقب ثلاث اسابيع.... رفيجات ام ياسمين كانو بيون يزورونها واهيه لبست بس كانت تبي شي ترفع فيه شعرها ومو لاقيه بين اغراضها ... راحت غرفتها فوق تدور ....
بطلت الادراج وقعدت تحوس فيهم... لقت شي... مسكته وقعدت عالفراش ....


--------------------------------------------------------------------
قبل 3 سنين ... كان عمر ياسمين 18 ... توها طالعه من الجامعه رايحه سيارتها
لقت عند باب السياره ساعه رجاليه طايحه... مسكتها وقعدت تتلفت يمين ويسار .. ما شافت احد ردت تطالع الساعه....
....: لو سمحتي ...
ياسمين : نعم..
....: اسف بس ساعتي
ياسمين : ها ( طالعت الساعه ) ايي اوكي.. لقيتها طايحه عند الباب ( عطته الساعه )
....: مشكوره
ياسمين : العفوو ( بطلت باب سيارتها بتركب )
... : ماعرفت اسمج
ياسمين : مو لازم ( ابتسمت وركبت السياره وصكت الباب وحركت على طول )

اليوم الي عقبه راحت سيارتها ولقت عليها صندوق صغير ومعاه ورقه....
بطلت الورقه تقرا شنو فيها ...
"" ما تدرين الساعه شكثر غاليه عليي... اشوه انج لقيتيها قبل لا احد ثاني ياخذها ... وهالهديه مني لج.. مشكوره مره ثانيه "" وحاط رقمه



بطلت ياسمين الهديه لقت سلسله وفيها قلبين الماس لازقين ابعض كان وايد ناعمه وسبمل ...
ردت البيت ودقت عالرقم... رد عليها من اول رنه جنه ناطرها تدق ...
...: الوووو
ياسمين : الو هااي
....: هلا
ياسمين : اسفه عالازعاج بس دقيت عشان ال...
....: عشان الهديه ؟ صح ؟
ياسمين : ايي... اسفه بس ماقدر ا خذها دقيت عليك عشان ترد تاخذها
....: ماله داعي .. ما كلفتني شي .....
ياسمين : حتى لو ... ماراح اخذها
....: خلاص قطيها بالشارع
ياسمين : هههههههه شنو ؟
....: فديت الضحكه ... شوفي ... الساعه هذي ساعة ابوي الله يرحمه ووايد غاليه عليي .. وارتحت وايد انج لقيتيها ... وصدقيني الهديه ما كلفتني شي ... تبين تاخذينها تستاهلينها... ماتبين قطيها بالشارع...
ياسمين : اي بس ...
...: لا بس ولا شي ... غير هالحجي ماعندي ...
ياسمين: انزين عيل انا اخليك الحين
...: اووكي
ياسمين : باي ..
وسكرت الخط



ثاني يوم داومت ياسمين واهيه لابستها .... مرت جدامه وشافها لابستها واستانس
دزلها مسج .. " مادري منو الي محلي الثاني فيكم "
ماردت عليه ياسمين ...
ردت البيت الظهر تغدت ونامت ... رن تلفونها طالعت الرقم ... ما ثبتت الرقم بس حست انه مار عليها قبل بس مو قادره تستوعب منو لانها دايخه فـ ردت عليه
ياسمين : الووو
....: انزين شدعوه عاد ماكو مشكور ولا شي ؟
ياسمين : هممم ؟!
...: شكلج نايمه وانا قعدتج صح
ياسمين : اممممم
.....: اسولف ولا اطلع قليل ادب ؟
ياسمين : ههههه بنام
.....: اخاف اخليج تنامين وارد ادق لما تصحين وماتعطيني ويه... جني بستغل الفرصه الحين
ياسمين : لا عفيه تعبانه وابي انام
....: توعديني لما تقعدين تدقين ؟
ياسمين : اممممم
.... : قولي وعد !!
ياسمين : ..... (ردت نامت )
قامت ياسمين من النوم ... لقت تلفونها يمها والخط مفتوح... مسكت التلفون مستغربه
ياسمين : الووو
....: صح النوم
ياسمين : انت ليلحين عالخط ؟
.....: قلتلج .. خفت اسكره ماتردين بعدين ... وبصراحه ماقدرت اقاوم صوتج وانتي تشخرين
ياسمين : شنووووووو .. انا ما اشخر
....: تبين اسجلج المره اليايه ؟
ياسمين : منو قال فيها مره يايه ؟
....: انا اقولج !
ياسمين : على كيفك اهوه صح ؟
.... : صح ... ممكن اعرف اسمج الحين ؟
ياسمين : هههه اسمي ياسمين ... وانته يالظريف شسمك ؟؟
....: عاشت الاسامي .... معاج عمر ..

----------------------------------------------


دشت ساره على ياسمين ...
ساره : ياسمييين... ما خلصتي ؟
ياسمين (فزت) : يمااا خرعتيني !
ساره: ههه اشفيج اسمالله عليج...
ياسمين : مادري خرعتيني
ساره : شنو الي بايدج ؟؟
ياسمين : هذي ساعة ابو عمر الله يرحمه
ساره : اول مره اشوفها ... من متى عندج
ياسمين : من اول ما عرفته
ساره : شكو ماخذتها ؟
ياسمين : هههه انا عرفته من هالساعه ... وعقب ما عرفنا بعض بفتره عطاني الساعه.. قالي انا وياج واحد وماتفرق اذا الساعه عندي ولا عندج... ماردنا انا وياج ابيت واحد...
ساره سكتت ماقدرت تقولها شي ...اهيه تدري الي تسويه ياسمين غلط بس بنفس الوقت كسرت خاطرها لانها اكثر وحده تدري ياسمين شكثر كانت تحب عمر....
ياسمين : يلا عيل خل انزل لا اتاخر
ساره : مالقيتي شي ترفعين فيه شعرج ؟
ياسمين : مو لازم...
بطلت الدرج ردت الساعه مكانها وطلعت....



بعد ماطلعت ياسمين من النفاس وردت البيت... ياسمين بالبيت بروحها وبدر طالع...
وخالد قاعد يبجي مستعسر واهيه مو عارفه شلون تسكته وماتدري اشفيه...
دش بدر البيت وشافها ....
بدر : اشفييه حبيبي ؟
ياسمين : مادري اشفيه اذاني مو راضي يسكت
بدر : مو مريض ؟
ياسمين : ( بعصبيه ) مادرييي
بدر : ييبيه
عطته ياسمين الياهل وقعدت تطالع شبيسوي ...
خذاه بدر لمه على صدره حيل وقعد يكلمه بصوت هادي ويتحرك وينقزه شوي شوي
فجاه... بجت ياسمين ...
بدر : انتي تبجين ؟ اشفيج ؟
ياسمين : مادري مو عارفتله ... في ام ما تعرف تسكت ولدها
بدر : هههه ياسمين ترا توه اول ياهل اكيد ماراح تعرفيله
ياسمين : اي بس كاهو سكت عندك وانا صارلي ساعه احاول اسكته مو قادره
بدر : انا متعود عاليهال ابيت اهلي ! متعود اشيلهم والعب معاهم .. انتو ما عندكم يهال وايد بالبيت اكيد ماراح تعرفيلهم ... وبعدين انتي متنرفزه لانه يبجي ترا الياهل يحس فيج
ياسمين : ماقدر انا تعبت ماقدر اكثر من جذي
بدر : زين والي يقولج انه الخدامه بتوصل بعد جم يوم ؟
ياسمين : اي خدامه ؟ عندنا خدامه احنا ليش بتييب غيرها ؟
بدر : لا الي بييبها هذي حق خلود بس ...
ياسمين : ماحب اقط ولدي عند خدامه
بدر : ماقلت قطيييه !! هذي عشان اغراضه اهوه بس .. هدومه واكله وجذي مو قصدي قطيه عليها ... ( يطالع خلود ويسوي روحه يحذفه بالهوا ) ما ينقط هذا
ياسمين ضحكت عليه شلون قاعد يحاجيه وراحت الغرفه ترتاح...
بعد ساعتين قامت على صوت خلود يبجي ...
راحت الصاله لقت بدر قاعد يبدله حفاظته ومبين عليه وايد متوهق
ياسمين : شقاعد تسوي ؟
بدر : قعدتي ! فضحنا ولدج
ياسمين : شحقه ما قلتلي ابدل حفاظته
بدر : كسر خاطري متضايق وقلت ببدل حفاظته ومابي اقعدج
ياسمين : هههه قوم خلاص انا ابدله
بدر : يلا انزين ( قام بسرعه )
ياسمين : طالع يبي الفكه
بدر : صراحه اي ... سويت روحي كلش وتوهقت
ياسمين : ههههه روح خلاص
بدر : زين عيل ببدل وبطلع ... تبين شي ؟
ياسمين : لا سلامتك
بدر : الله يسلمج..


قعدت ياسمين تبدل خلود...
وقامت تفكر شكثر بدر يموت عليه ومدلعه حيل ... وتذكرت ....



---------------------
ياسمين : شنو يعني ؟ اذا صار عندنا يهال بتدلعهم اكثر مني ؟
عمر : خل نتزوج بس وتييبين خلووود وانا اوريج شكثر بدلعه ... الي يبيه بياخذه محد يقوله لا ..... الغالي ولد الغالي هذا ....
ياسمين : هههه اهم شي ولد الغالي !
عمر : اي بعد شنو !! قولي مو غالي بعد
ياسمين : لا غالي ولا تزعل ...
عمر : كا صورتي وانا صغير ... والاااااااااااااابيييييييييي والله كنت حلو
ياسمين : ههههههههههههههههههههههه
عمر : اشفيج تضحكين ؟
ياسمين : وا لابي شنو بعد ؟
عمر : حالها حال وا حلااااااااته ... هذي اللغه الي تحاجين فيها اليهال هالايام
-------------------



بدل بدر هدومه وطلع من الغرفه...
بدر : اشفيج تضحكين ؟
ياسمين : هاا ؟
بدر : اشفيج تضحكين !
ياسمين : ههه لا بس تذكرت شكلك وانته تبدله ...
بدر : زين انا طالع .. باي
ياسمين : الله معاك ...

البارت الخامس..




ثاني يوم ....
بدر وياسمين كانو رايحين يتغدون ابيت اهلها ..
قاعدين يسولفون ومستانسين كلهم... بس ساره اختها ما كانت على بعضها ....
خلصوا الغدا وقعدو يسولفون ويشربون جاي ....
بو ياسمين : اي يبا بدر جذي ... ونسونا بييتكم سويتولنا حركه بالبيت
بدر : والله عمي ما يمديني ولا من زمان ودي اييكم
ام ياسمين (تلعب خلود ) : اي عاد شدعوه تعالو كل اسبوع .. نوله على هالنتفه هذا هالنزغه
بدر : قولي حق ياسمين عمتي ... اهيه الي ماترضى تطلع من البيت الا بطلعة الروح ولا انا ما امنعها من الطلعه شلون بيت اهلها عيل ؟
ام ياسمين : يعني ياسمين الحين مالج حجه... بتيينا كل اسبوع
ياسمين : اي انشالله ... عشان تفكوني من خلود شوي بعد
بو ياسمين : من كبره خلود عشان نفكج منه ؟
بدر : لا تشوفها عمي بالبيت اذا بجى ... تبجي معاه
ام ياسمين : ويي ياسمين ! فشلتينا !
ياسمين : يمه بعد ماعرفله شنو !!
ام ياسمين : ما تعرفيله شنو بعد ! ياهل شيبيله !
بدر : انزين يلا عيل انا استاذن
بو ياسمين : وين يبا ؟ تو الناس
بدر : عندي شغل عمي ... انشالله المره اليايه اقعد اكثر
بو ياسمين : على خير يبا
بدر : ياسمين تقعدين واردلج بليل ؟
ياسمين : اي خلاص روح ومتى ما خلصت تعال
بدر : خلاص اوكي... يلا عيل فمان الله
الكل : الله معاك



"ام ياسمين : اي اي خليه يما
ياسمين : اوكي ....
راحو فوق ... دشت ساره الغرفه ودشت وراها ياسمين ... صكت الباب وقفلته
ياسمين : الله الله !! قفلتيه بعد ؟ شصاير ؟
ساره : قعدي بكلمج
ياسمين (قعدت عالقنفه ): اشفيج شصاير ؟ صايرلج شي ؟!
ساره : لا.. ياسمين عمر دق عليي امس




ياسمين (حطت ايدها على قلبها) : شنو؟! ليش ؟! شلون ؟!
ساره: اشفيج ؟ مو رقمي عنده من زمان ؟ وانتي غيرتي رقمج لما تزوجتي !
ياسمين : شقال ؟ (عيونها مغورقه )
ساره : قالي انه توه راد الكويت و ...
ياسمين : توه راد ؟؟؟؟؟ وين كان ؟!
ساره : نطري اهدي خليني اكمل !
ياسمين : كملي بسرعه ( ترجف )
ساره : كان مسوي حادث واهله خذوه بره يعالجونه ... تلفونه واغراضه كلهم كانو اهني فـ ما قدر يدق عليج من اهناك لما صحى ...



ياسمين : سنه كامله وفوق علاج ؟ ماقدر يرد ؟ ماقدر يقول حق احد اييبله تلفونه ؟
ساره : ياسمين هدي اشفيج !! اهوه علاجه طول وغير جذي علاج طبيعي ولويه ... وقال بعد انه كان مراجعات و جذي فـ ظل مع اهله اهناك بدال لا يروحون ويردون كل شوي امه ماكانت راضيه انه يرد الكويت ... خافت انه يصير فيه شي وماتبي تدخله مستشفى اهني تبي نفس المستشفى الي كان يعالج فيه بره..
ياسمين : شنو قال ؟ سال عني ؟
ساره : اي
ياسمين : شقال ... شقلتيله ؟ قلتيله اني تزوجت ؟
ساره : سالني وقلتله ... قال ليش استعيلت وجذي ... قلتله انه اهوه خوش صبي وسنع واهيه ماعندها عذر ترده وابوي وامي ضغطو عليها ورضت ....
ياسمين : ابي اكلمه... ييبي تلفونج وين تلفونج
ساره : ياسمين اشفيج انتي متزوجه




ياسمين : خلصيني وينه !!!!
ساره : هاج بس ....
ياسمين خذت التلفون بسرعه بطلت اللوق وشافت رقم مو مسيف... طالعته وورته ساره
ياسمين : هذا رقمه ؟
ساره : اي
دقت وقعدت تنطر ... ثلاث رنات ورد عليها ...



عمر : هلا ساره
ياسمين (بصوت يرجف) : عمر انا ياسمين
عمر : ياسمين ... حبيبتي شلونج ؟
ياسمين : دام انته مو معاي انا مو زينه ( بجت )
عمر : لا تبجين ياسمين ... شلون ولدج ؟
ياسمين : بخير ...
عمر : شسميتيه ؟
ياسمين : خالد
عمر : مو اتفقنا الولد العود اسمه حمد ؟
ياسمين : دام مو منك ماحبيت اسميه حمد
عمر : وينج انتي ؟
ياسمين : ابيت اهلي
عمر : شلون ريلج معاج ؟
ياسمين : تمام
عمر : حبيبي مستانسه ؟
ياسمين : دام انته مو معاي لا
عمر : حبيبي انتي والله ماكان بايدي ... سفروني بره وانا ماكنت بوعيي واغراضي كلها اهني ... اول ما رديت شريتلي خط ودقيت على رقمج القديم طلع مفصول ... ودقيت على ساره
ياسمين : عمر انا ولهانه عليك ( بجت )
عمر : حبيبي وانا اكثر والله ... يلا عاد دام تطمنت انج بخير الحين بس خلاص مابي شي .... ديربالج على بيتج وولدج
ياسمين : منو قال انا بخير ؟ والله مو بخير ... عموور قاعده افكر فيك بكل وقت ... كل شي يذكرني فيك... على بالي طول الوقت والله ... ولهانه عليك حرام عليك وانته تقولي بخير ؟




عمر : شتبينا نسوي ياسمين ؟! خلاص متزوجه انتي انسي
ياسمين : في احد ينسى روحه ؟
عمر : حبيبي خلاص عاد لا تعورين قلبي
ياسمين : وانا ؟ قلبي ما يعورني بعد ؟ ولا انا ماحس ؟
عمر : سووومه ... اهدي الحين ... وخلج مع ريلج لا تخربين بيتج
ياسمين : مابييييه عمر مابييييه ابيك انت
عمر : ياسمين ينيتي ؟ اهدي الحين ! وبعدين يصير خير !!



ساره : ياسمين صوت امي مع خلود يايه
ياسمين : خلاص اكلمك بعدين
عمر : ديربالج على نفسج
ياسمين : وانته بعد ... باي
عمر: باي



قامت ياسمين بسرعه جابلت المنظره وخذت كحل تسوي روحها تتكحل وساره بطلت الباب وردت قعدت
دشت ام ياسمين وبايدها خلود
ام ياسمين : هاج ولدج مل مني ... اشفيها عيونج ؟
ياسمين : بطيت عيوني بالكحل
ام ياسمين : هووو ياهل ؟ ولا اول مره تتكحلين !
ياسمين : قاعده اسولف مع ساره مانتبهت هههه
ساره خذت خلود وقاعده تلعبه وام ياسمين طلعت...
صار بليل ومر بدر خذا ياسمين وردو البيت ... وطول الطريج كانت ساكته...
دشت ياسمين ووراحت فوق على طول ...
راح وراها بدر ....
بدر : فيج شي ؟
ياسمين : لا ليش ؟
بدر : مادري جنج متضايقه
ياسمين : يتراوالك .. بروح انوم خلود
بدر : نوميه اهني
ياسمين : لا الليت مبطل ماراح ينام ...
طلعت وخلته...

البارت السادس



بدر : فيج شي ؟
ياسمين : لا ليش ؟
بدر : مادري جنج متضايقه
ياسمين : يتراوالك .. بروح انوم خلود
بدر : نوميه اهني
ياسمين : لا الليت مبطل ماراح ينام ...
طلعت وخلته...

راحت ياسمين نومت خلود وردت الغرفه لقت بدر منسدح عالفراش يبي ينام... طالعته وماقالت شي ....
بدلت هدومها .. لبست شورت وردي قصير وتوب ناعم ... انسدحت عالفراش وعطت بدر ظهرها...
تذكرت عمر ... صوته .. كلامه ... حست بخوف من بدر ... خافت انه يدري ... خافت لا يحس ... التفتت عليه وقربت منه.. ومسكت ايده !!
بدر : اشفيج ؟
ياسمين : ولا شي
بدر : تعالي...
قرب شوي .. لمها ونامو .....

مر اسبوع وكانت ياسمين قد ما تقدر تتحاشى المكان الي يقعد فيه بدر عشان ما يبين عليها شي ... بس ماكانت تدري عن عمر ولا تسال ساره عنه ....



بليل ....

ياسمين كانت قاعده بالصاله وماسكه خلود .... دش بدر البيت
بدر : قومي قومي قومي
ياسمين : اقوم وين ؟
بدر : قومي بسرعه خلصيني !!!
ياسمين : اشفيك ؟! شنو ؟!
بدر : قومي بره يلا !
ياسمين : بره وين ؟ شتقول انته
بدر : قومي لبسي بنطلع ثلاثتنا يلا
ياسمين : وين ؟
بدر : نتمشى ونتعشى بره
ياسمين : يلا الحين اقوم البس واقول حق الخدامه بعد
بدر : تقولين حق الخدامه ليش ؟
ياسمين : خدامة خلود.. عشان تمسكه شوي
بدر : لا لا ... بس ثلاثتنا نطلع... يلا بسرعه
ياسمين : اوكي مسكه عيل شوي على ما البس ...
راحت ياسمين لبست وحطت كحل خفيف ومسكرا وقلوس وعدلت شعرها شوي .. خذت خلود من بدر لبسته وطلعو ...
راحو تمشو شوي وتسوقو....
بدر : يلا وين تبينا نتعشى
ياسمين : لا بدر خل نرد البيت ... خلود شكله بينام وبعدين بياذيني وانا اتعشى
بدر : ناخذ تيك اوي ؟؟
ياسمين : امممم شرايك نرد البيت وانوم خلود وانا اسويلك عشى ونقعد مع بعض ونسهر
بدر : ليش ما ناخذ من مطعم ونرد تنومين خلود ونسهر مع بعض ... مصممه تدشين المطبخ يعني ؟
ياسمين : حاط مطعم ابالك وتبي تاكل منه صح ؟
بدر : تقدرين تقولين جذي
ياسمين : هههه يلا على راحتك



وظلت ياسمين طول الطريج ساكته وبدر يحاول يسولف واهيه ترد على قد كلامه.....
راحو خذولهم من المطعم ووصلو البيت... ياسمين عطت خلود حق خدامته وراحت قعدت مع بدر تتعشى....
بدر : ياسمين ما رحتي بيت اهلج هالاسبوع
ياسمين : مالي خلق بعدين اروح
بدر : متهاوشه معاهم انتي ولا شنو ؟
ياسمين : لا ليش ؟
بدر : مادري الاسبوع الي طاف راده مالج خلق وهالاسبوع ما قلتي بروح
ياسمين : مادري راح عن بالي... باجر اروح
بدر : لا باجر لا .... امي عازمتنا
ياسمين : اممم اوكي
بدر : اذا ماتبين اقول حق امي تاجلها يوم ثاني عادي
ياسمين : لا لا عادي اروح...
خلصو عشا وسهرو مع بعض وكانت ياسمين تحاول انها تقرب منه اكثر من قبل عشان ما تبينله انه فيها شي او انه بالها مو معاها ... وبدر كان وايد مستانس منها ذاك اليوم لانه حس انها صج كانت تحاول تقرب منه اكثر ...



ثاني يوم ( عند اهل بدر )

اول ما دشو البيت ...
ام بدر : هلاااا والله اهلين ... نور البيت
ياسمين : بوجودج خالتي ( باست راسها )
بدر ( بايده خلود ) : شلونج يما ؟
ام بدر : هلا حبيبي... ييبو حبيبي ييبوووو ( خذته من بدر )
بدر : يما شدعوه لميتيه وبستيه قبلي
ام بدر : اي هذا الغالي بس راحت عليك انته الحين !!
دشو داخل وسلمت ياسمين على خواته وابوه ..
راحو تغدو وخلصو وقعدو يسولفون...
ياسمين لاحظت خالتها لابسه سوار وايد حلو وناعم
ياسمين : خالتي ماشالله سوارج وايد حلو يهبل
ام بدر : ويي عندي من زمان من جم سنه ولا لبسته ولا مره
ياسمين : لا ماشالله وايد حلو عليج بالعافيه
قامت ام بدر فصخته وعطته ياسمين
ام بدر : هاج ما يغلى عليج
ياسمين : لا لا خالتي مو قصدي والله
ام بدر : ميخالف اخذيه ... انتي مرت الغالي وام الغالي بعد
بدر : يعني يما مايصير مرت الغالي وبس ؟؟؟ لازم ام الغالي ؟
ام بدر : اي لازم... خلود يعيش مثل الملك اهني
بدر : صبري عليي ان ما تبريت منه ! ماشي ماشي




خلصو سوالف وطاف الوقت بسرعه وصار الليل وردو البيت .....



ثاني يوم ياسمين دقت على بدر واهوه بالدوام وقالتله انها بتتغدا ابيت اهلها وقالت حق الخدامه تسويله غداه ...
راحت ياسمين تغدت وعقب ما خلصو خلت خلود نايم عند امها وراحت قعدت مع ساره ...
ساره : ترا ليلحين يدق يسال
ياسمين : بس عفيه ساره الله يخليج لا تقوليلي ... قاعده احاول انسى واتعدل مع بدر... مابي شي يخرب بيتي الحين عندي ولد حرام ينظلم بينا
ساره : وين هالحجي قبل ؟
ياسمين : مادري... لما كلمته حسيت اني بخسر بدر واهوه ما يستاهل اسوي فيه جذي وماراح القى مثله... صج ليلحين احب عمر بس مابي اظلم بدر ولا اظلم ولدي
ساره : الله يهديج



بعد 6 شهور ...
بدر وياسمين العصر قاعدين بالغرفه .....
بدر : ياسمين انتي ليلحين تاخذين حبوب ؟
ياسمين : اي ..
بدر : مو ناويه تقطينهم ؟
ياسمين : لا ليش ؟ ترا خلود بعده صغير
بدر : وين بعده صغير عمره 8 اشهر... على ما تحملين وتييبين ياهل بيكون عمره سنه ونص تقريبا يعني مو صغير !
ياسمين : بدر ليش مستعيل عاليهال ؟ تو الناس خل بدور يكمل سنه ويصير خير
بدر : ترا مو من اول ما تقطين الحبوب راح تحملين !
ياسمين : انت شدراك ؟ يمكن من اقطهم راح احمل .. وانا ما عندي استعداد الوي مع اثنين ! خلود كافي الحين
بدر : شضارج فيه خلود ؟ كاهي خدامته عنده ! يعني لما تييبين ياهل الخدامه تجابل خلود شوي اكثر وانتي جابلي الياهل اليديد
ياسمين : لا بدر مابي بعدين افكر بالموضوع
بدر : على راحتج
باس راسها وطلع قعد بالصاله...
ياسمين تضايقت شوي من الموضوع وراحتله الصاله وقعدت يمه...
ياسمين : زعلان ؟
بدر : لا
ياسمين : احلف
بدر : امممم
ياسمين : بدر انته مو حاس فيني ترا مجابل اليهال صعب !
بدر : قلتلج على ما تحملين وتولدين بيكون خلود كبير !
ياسمين : ولو ! هم بيصير لويه وحوسه !
بدر : خلاص قلتلج على راحتج شحقه لاحقتني لي اهني ؟
ياسمين : بدررر
بدر : .....
ياسمين : بدووووورو
بدر ( ابتسم ) : عيونه
ياسمين : لا تزعل
بدر : في احد يزعل على قلبه ؟
ياسمين : يعني مو زعلان ؟
بدر : تقطين الحبوب ؟
ياسمين : هففففف راح تحن ليما تاخذ الي تبيه صح ؟
بدر : اي
ياسمين : خلاص ماشي




بعد شهرين ...
الصبح قبل لا يروح بدر الدوام....
ياسمين : شنو تبي الغدا اليوم ؟
بدر : عادي اي شي من ايدج حلو
ياسمين : هههه من متى انا الي اطبخ ؟
بدر : يعني قاعد اجاملج طوفي
ياسمين : انزين ميخالف وانته راد تمر الصيدليه ؟
بدر : ليش شنو تبين ؟
ياسمين : اختبار حمل ....
التفت عليها بدر وماقال شي بس ابتسم ...
بدر : تبين شي ثاني بعد ؟؟
ياسمين : لا سلامتك
طلع بدر وقعدت ياسمين تحاتي اذا كانت حامل او لا ....
رد بدر البيت وياسمين كانت ناطرته تحت وحاطين الغدا
بدر : السلام
ياسمين : هلا وعليكم السلام ... يلا بدل بسرعه وتعال تغدا ميته يوع
بدر : ماكو غدا قومي
ياسمين : ليش ؟!
بدر : حللي اول شي حامل ولا لا
ياسمين : بدر خلها عقب الغدا
بدر : ماكو ماراح اتغدا الا لما اعرف
ياسمين : افففف منك مادري ليش مستعيل يلا قمت
قامت ياسمين خذت الاختبار من بدر وراحت الحمام ... وبدر قاعد ينطرها بره
طلعت ياسمين عقب جم دقيقه .... طالعت بدر وماتحجت ...
بدر : هاا ؟ شنو طلع ؟
ياسمين : انا حامل ( ابتسمت )
بدر : صج ؟؟ (قام لمها )
ياسمين : اي بس باجر بروح العياده احلل اهناك
بدر : خلاص اخذ اجازه وايي معاج
ياسمين : لا مو لازم... اروح بروحي
بدر : خلاص على راحتج...

البارت السابع...


ثاني يوم الصبح...
بدر : ياسميين ... ياسميييييين قومي
ياسمين : همممم... ( بطلت عيونها وابتسمت ) جم الساعه
بدر : الساعه 7
ياسمين : ليش مارحت الدوام ؟
بدر : كاني الحين بروح... بس قعدتج عشان تصحصحين شوي واذكرج تروحين العياده
ياسمين : واااي بدر تو الناس حرام عليك وايد مبجر
بدر : هههه قومي قومي بلا كسل ... يلا انا طالع تبين شي ؟
ياسمين : سلامتك
بدر : دقي عليي اول ما تطلعين من العياده اوكي ؟
ياسمين : اوكي
بدر : يلا مع السلامه..
ياسمين : باااي




راحت ياسمين العياده وفحصت ... خلصت وطلعت وردت البيت بدون ماتدق على بدر...
دق بدر على ياسمين وماردت ... دق عالبيت ردت عليه الخدامه وقالتله انها نايمه......
رد بدر البيت لقى الغدا جاهز وخلود مع الخدامه قاعد يلعب... راح فوق حق ياسمين...
بدر : ياسمين ؟ ادري انج مو نايمه قومي
التفتت عليه ياسمين وما قالت شي
بدر : اشفيج شقالت الدكتوره ؟
ياسمين : مو حامل... الجيس فاضي
بدر : شنو يعني شبتسوين الحين ؟
ياسمين : الدكتوره تقول لازم تنظيفات حق الرحم
بدر : ومتى بتسوينها ؟
ياسمين : بنطر الجيس ينزل بروحه وبعدين اروح
بدر ماعرف شيقول ولا يدري اهوه شنو كان حاس فيه بس باس راسها وقام بدل هدومه
بدر : ماتبين تتغدين ؟
ياسمين : مو مشتهيه
بدر : قومي عاد عشاني .. ماقدر اكل بروحي
ياسمين : اوكي انزل وانا الحين ايي وراك بس بغسل
بدر : اوكي ..




مر اسبوعين ... ياسمين سوت فيهم التنظيفات وردت البيت...

بدر كان قاعد يتحاشى انه يتكلم مع ياسمين... يرد من الدوام يتغدا وينام ولما يقعد يطلع ومايرد الا بليل عشان ينام على طول....
يوم من الايام واهوه راد بليل ...
ياسمين : بدر بكلمك شوي
بدر : بنام تعبان ... فيج شي ؟
ياسمين : لا ... انته الي فيك ! اشفيك جذي ؟؟
بدر : اشفيني ؟
ياسمين : بدر ترا عادي هالشي يصير حق بنات وايد وكاني جدامك مافيني شي ما مت ترا
بدر : انا الي حنيت عليج عاليهال .. كله مني
ياسمين : مو كله منك ... شي الله كاتبه وصار ... ميخالف تنسى ونرد نعيش حياتنا مثل قبل ؟
بدر : اوكي
ياسمين : ميخالف تبتسم ؟ مو عاجبني ويهك جذي !
بدر سوا روحه يبتسم بطريقه غبيه
ياسمين : لا والله ؟ نام نام ( حذفته بالمخده )
ضحك بدر ورد حذف المخده عليها ونام
ردت حياتهم طبيعيه .... وردت ياسمين تاخذ الحبوب وبدر يدري واهوه الي قالها ...
مرت 6 شهور ... عمر خلود الحين سنه وشهرين ...




ياسمين : بدر ترا خلود من زمان ما طلعناه حرام ضايق خلقه بالبيت
بدر : خلود الي ضايق خلقه ولا انتي ؟
ياسمين : هههه اثنينا
بدر : ليلحين ما فكرتي بالشغل ؟
ياسمين : لا بس تعودت على قعدة البيت ... وخلود تعود عليي بعد ماقدر اهده الصبح
بدر : انزين ليش ماتروحين نادي الصبح ولا تسوين شي تضيعين وقتج فيه ؟
ياسمين : مادري مو حاطه ابالي ...
بدر : خلاص اوكي... قومي لبسي عيل وقولي حق الخدامه تلبس خلود عشان نطلع
ياسمين : اوكي..
لبسو كلهم وطلعو... ودو خلود عشان يلعب وتمشو شويه ... وراحو عشان يتعشون....
دشو المطعم وقعدو...
بدر : هذا الحين شنو نوكله ؟
ياسمين : عادي ياكل اي شي معاي
بدر : اخاف يغص
ياسمين : انا الي بوكله ماراح ياكل بروحه ترا
بدر : هذا جنه عبيد
ياسمين : اي عبيد ؟
بدر : واحد من الربع من زمان مو شايفه... اي والله اهوه ... لحظه اروح اسلم عليه وارد
ياسمين : اوكي



قام بدر يسلم على رفيجه والتفتت ياسمين صوبهم.... لفت ويهها يتشوف خلود وشافت عمر...
كبر ... ملامحه ما تغيرت وايد بس صار احلى من قبل ... طالعته وماقدرت توخر عينها عنه... واهوه كان شايفها قبل لا اهيه تشوفه وهم عينه كانت عليها ....
يطالعون بعض واثنينهم ولهانين على بعض حيل ..... ياسمين كان ودها تقوم.. تركض وتروح تلمه ... ولهانه عليه .. على كل شي فيه ...
قطع تفكيرها بدر الي مر جدامها عشان يقعد ....
بدر : حده قديم عبييد من زمان ما شفته ههه
ياسمين : ها ؟
بدر : اشفيج ؟ اتحجى عن عبيد رفيجي من زمان ما شفته
ياسمين : امممم
قعدو يتعشون وكانت ياسمين غصب تاكل ومالها خلق تسولف.... بدر لاحظها....
بدر : تبين نمشي ؟
ياسمين : خلصت انته ؟
بدر : لا بس جنه فيج شي
ياسمين : لا ماكو شي بس فيني النوم قاعده مبجر
بدر : خلاص عيل الحين نقوم..



دفعو الحساب وقامو... واول ما قامت ياسمين التفتت طالعت عمر الي كان طول الوقت قاعد يطالعها ولا شال عينه عنها ....

ردو البيت ياسمين صعدت بسرعه بدلت ونامت على طول .... بدر لاحظ انها مو طبيعيه بس سكت وما قالها شي ....

ثاني يوم الصبح قام بدر لقى ياسمين مو يمه....
طلع راح الصاله لقاها قاعده
بدر : صباح الخير
ياسمين : صباح النور
بدر : شمقعدج ؟
ياسمين : مادري.. قمت الفير شبعانه نوم
بدر : اوكي خل ابدل عيل واروح الدوام
ياسمين : اوكي




غسل بدر ولبس مالقى ياسمين فوق ... نزل تحت لقاها قاعده
ياسمين : تعال اشرب عصير قبل لا تروح
يا بدر بسرعه شرب شوي...
بدر : يلا عشان لا اتاخر
وراح بسرعه عند الباب
ياسمين : بدر لحظه
بدر ( واقف عند الباب ) : هلا ؟
راحتله ياسمين وباسته : ديربالك
بدر ( ابتسم ) : انشالله... (باس راسها وطلع)
طلع بدر وقعدت ياسمين تطل من الدريشه ليما ركب سيارته وراح ...
راحت ياسمين غرفتها تركض... سكرت الباب وقعدت عالارض لمت روحها وقعدت تبجي...
بجت ما تدري ليش ... لانها ظالمه بدر ... ولا لانها ولهانه على عمر ...
داخت ياسمين من البجي ونامت عالارض....
قامت بعد ساعه وراسها يعورها ....




دقت على ساره....
ياسمين : ساره وينج ؟
ساره : بالبيت ليش ؟
ياسمين : ماعندج محاضره اليوم ؟
ساره : لا ليش ؟
ياسمين : خلاص بييج البيت الحين
ساره : اوكي باي
ياسمين : باي
قامت لبست وقالت حق الخدامه تلبس خلود وراحو بيت امها .. دزت مسج حق بدر انها رايحتلهم
دشت ياسمين البيت لقت امها موجوده
ام ياسمين : هلا يما ... شيايبج هالحزه مو عادتج
ياسمين : ماكو متملله... وين ساره عيل ؟
ام ياسمين : فوق
ياسمين : رايحه مكان ؟
ام ياسمين : اي بروح الجمعيه... ييبي خل اخذ خلود معاي يستانس
ياسمين : اوكي ...




صعدت ياسمين بسرعه فوق ودشت غرفة ساره
ساره : ها وصلتي...
ياسمين ما تحجت بس صكت الباب وقعدت عالفراش جابلتها
ساره : اشفيج اسمالله عليج ؟
ياسمين : عمر .... ( عيونها مغورقه )
ساره ( حطت ايدها على قلبها ) : يما.. اشفيه شصار
ياسمين : شفته امس
ساره : وين ؟
ياسمين : كنت طالعه مع بدر ( بجت )
ساره : ياسمينو لا تخرعيني صار شي ؟
ياسمين : لا
ساره : اشفيج ليش تبجين عيل ؟
ياسمين : ساره ولهانه عليه حيل بموت... شفته ما تحملت حسيت روحي بتطلع
ساره سكتت ما قالت شي ....
ياسمين : قوليلي انه مو قاعد يسال ... قوليلي انه مو ولهان عليي... الله يخليج ساره ... قوليلي انه لقى غيري قوليلي حب وحده ثانيه الله يخليج قوليي
قامت ساره لمتها وقعدت تقرا عليها
ياسمين : الله يخليج ساره مو قادره خلاص مو قادره اتحمل اكثر ... ذبحيني فكيني من حياتي خلاص ماقدر ...
ساره : ياسمين اسمالله عليج اشفيج خلاص !!!!!!
ياسمين : قلبي يعورني ساره ااااااااخ
لمتها ساره حيل ومو عارفه شتسويلها ردت تقرا عليها ليما هدت وطخت شوي .....
قعدت ياسمين ابيت اهلها لي الليل وردت بعدين البيت
صعدت الغرفه لقت بدر قاعد
بدر : ها ييتي... وين خلود ولهت عليه
ياسمين : نايم
بدر : فيج شي ؟
ياسمين : بدر بكلمك شوي
بدر : اشفيج قولي ؟
ياسمين : بدر لا تزعل مني
بدر : اشفيج تحجي لا تخرعيني ؟




ياسمين : طلقني...​