من تجرأ من قطف هالياسمين

صار الليل ... وردت ياسمين البيت وعمر ماكان موجود ... ورد بليل متاخر حيل حط راسه ونام بدون ما يكلمها ....

اليوم الي عقبه ....
عند بدر ...

خلود : نلوح عند ماما اليوم ؟
بدر : اي الحين نروح
خلود : مانلوح بحر ؟
بدر : خلود شلون نلوح وبحر تقولها عادي ؟ لا ماكو بحر اليوم
خلود ضحك وطالع بدر ...
بدر : شيطان شيطان ... يلا امش

بدر شال خلود وناده الخدامه وراحو بيت ام ياسمين ...
عند بيت ام ياسمين ...
وصل بدر ولقى ام ياسمين توها راده البيت

ام ياسمين : هااا وصل الحلو.... هلا هلا هلا
بدر : مشكوره عمتي ماله داعي الاحراج
ام ياسمين : ههههه ما تيوز من سوالفك ... شلونك يما بدر ؟
بدر : بخير الله يسلمج.. شلونج انتي شلون عمي ؟
ام ياسمين : كلنا بخير ... حياك داخل
بدر : لا ماله داعي
ام ياسمين : تعال بس اقعد شوي اشرب معاي جاي قاعده بروحي متملله
بدر : يلا ماشي

دش بدر مع ام ياسمين .. قالت حق الخدامه تسويلهم جاي وقعدت تسولف معاه
حطت خلود بحضنها وقعدت تسولف معاه ...

ام ياسمين : ها حبيبي استانست مع بابا ؟
خلود : اي
ام ياسمين : وين رحتو ؟؟؟
خلود ماسك السلسله الي اهيه ماسكتها وقاعد يلعب فيه ...
ام ياسمين : قولي وين رحتوووو
بدر : خلود رد على ماما عوده قولها وين رحنا ؟
خلود : وين ؟
بدر : رحنا البحر ... صح ؟
خلود : ايي شفنا سمج واااايد ... السمجه تمشي جذي ( حط ايده على بعض ويحركها يمين يسار)
ام ياسمين : وين موديه الي شايف السمج ؟
بدر : موديه البحر عمتي ماكو سمج جذاب هههه
ام ياسمين : من وين ياب هالحركه اسمالله عليه ؟
بدر : هههه مادري يمكن امه
ام ياسمين : لا مو امه
بدر : تلفزيون عيل ... ما وديته مكان انا .. بس يومين ورا بعض البحر ومستانس كان يبي يروح اليوم ...
ام ياسمين : طالع على ابوه يحب البحر
بدر : اي يمكن ... يلا عيل عمتي انا امشي
ام ياسمين : بدر اذا تحاتي ياسمين ترا ماراح توصل الحين تو الناس
بدر : ميخالف ... انا عندي شوية شغل بعد ...
ام ياسمين : على راحتك يما
بدر : مع السلامه

راح بدر باس راس ام ياسمين ... وباس خلود وراح...

عند ياسمين ..
قامت ياسمين من النوم مالقت عمر ... دقت عليه ما رد ..
توها بتقوم من الفراش جان يوصلها مسج وكان من عمر
" انا عند امي وبتغدا اهناك .. اشوفج بليل "
ياسمين ردت عليه " والغدا ماراح يخلص الا بليل ؟! سلم عليهم "
قامت ياسمين بدلت وراحت بيت امها ... دشت ولقت خلود قاعد يلعب

ياسمين : هلا حبيبي هلا خلودي
خلود قام وراحلها وياسمين لمته حيل ...
ياسمين : شلون ايدك حبيبي ؟ تعورك ؟
خلود : لا
ياسمين : يما ما سالتي بدر عن ايده ؟
ام ياسمين : سالته قال عادي كان كل شوي يبجي لانه مضايقته بس عادي مو متعور يعني
ياسمين : زين اشوه
ام ياسمين : بتاخذينه وتروحون الحين ؟
ياسمين : لا عمر بيتغدا عند امه ماعندي شي اسويه بالبيت
ام ياسمين : وليش ما تتغدين معاهم ؟ فشله من زمان ما رحتيلهم
ياسمين : يما اهوه عمر مادري اشفيه ... من طاحت امه واهوه صاير 24 ساعه اهناك ومايرد البيت الا اخر الليل .. .
ام ياسمين : بدينا تحلطم وتطلعين عيوب بالريال ؟
ياسمين : يما شدعوه !!
ام ياسمين : بس بس ! الريال كامل والكامل الله .. شزينه جمال ومال وسنع وذرابه !
ياسمين : وهذا الي هامج ؟
ام ياسمين : انتي الظاهر قعدة البيت ماثره على مخج وبليس يلعب براسج وايد
ياسمين : اي يمكن ... خلاص اكلمه اليوم اقوله بشتغل
ام ياسمين : على راحتج .. وهالنتفه هذا يقعد عند منو
ياسمين : مادري يمكن اييبه عندج اذا توظفت عاد ... اوراقي كلهم عندج صح ؟
ام ياسمين : اي .. تبينهم ؟
ياسمين : لا خليهم بس اشوف متى ابي اروح اقدم واشوف شنو الاوراق الي يبونها وبعدين اقولج ...
ام ياسمين : خلاص الله يوفقج..


ردت ياسمين البيت العصر ... لقت سيارة عمر بره وراحت بسرعه تركض فوق قبل الخدامه وخلود ...
دشت الغرفه لقت عمر نايم ... راحت قعدت يمه....

ياسمين : عمر ... عمووور
عمر : هاا .. جم الساعه ؟
ياسمين : توها 5
عمر : وييه وايد نمت اشوه قعدتيني
ياسمين : بتطلع ؟
عمر : لا ...
ياسمين : انزين يلا غسل وتعال ابي اكلمك شوي
عمر : شصاير بعد ؟
ياسمين : مو صاير شي بس بروح اقدم على وظيفه ...
عمر : ليش ؟!
ياسمين : شنو ليش ؟
عمر : انا مقصر معاج بالفلوس ؟
ياسمين : لا مو قصدي بس مابي اقعد بالبيت واجازتك بتخلص عقب اسبوعين... بقعد بالبيت بروحي وملل
عمر : مو بروحج عندج خلود
ياسمين : ولي متى بجابل خلود ؟؟ طول اليوم ؟ ابي اشتاقله ابي الهي نفسي شوي
عمر : ماكو وظيفه.. فكينا من هالسالفه
ياسمين : ليش ؟
عمر : بدون ليش .. لا يعني لا ولا تعاندين ...
ياسمين : بس عمر ...
قام عمر بسرعه وراح يتسبح...
ولما طلع خذا سويج سيارته وطلع ..

ياسمين بقلبها " افففففففف مادري شصاير فيه "

قعدت ياسمين طول الاسبوع تحاول تقنع عمر كل ما شافته ولو انها ماكانت تشوفه باليوم الا ساعه او ساعتين ...

صار ويك اند وراح بدر بيت ام ياسمين عشان ياخذ خلود ...
ام ياسمين كانت قاعده بالحديقه مع خلود والخدامه ...
بدر : السلام عليكم
ام ياسمين : تعال تعال اخذ ولدك
بدر : اوله عمتي لي هالدرجه تبين الفكه منه ...
ام ياسمين : اذاني ولدك .. لا سلام ولا شي .. اخذه وروحو
بدر : ليش عمتي ليش ... شمسويلج ؟
ام ياسمين : قاعد يحن صارله اسبوع ماذيني وماذي امه ... ابي بحل وابي بحل
بدر : ههههههه خلود تبي بحر بابا ؟
خلود : ايي
بدر : يلا امش
ام ياسمين : اي وده فكوني... فتحت علينا باب كان مسكر ... مادري من وين يتبلنا سالفة البحر هذي بعد !!
بدر : هههه بتولهين عليه بهالثلاث ايام
ام ياسمين : هههه اي والله ازعاجه يبين
بدر : يلا تامرين على شي عمتي ؟
ام ياسمين : لا سلامتك وده البحر بس عفيه
بدر : انشالله ... يالله مع السلامه
ام ياسمين : حافظك الله..


راحو بدر وخلود ومعاهم الخدامه البحر ونزلو ...
كان الموج ياي والجو حده حلو ... خلود اول مانزلو عالرمل قام يركض عند الموج !!!!!
الخدامه راحت وراه بسرعه ومسكت ايده ومشت معاه تلعبه بالماي شوي ...
بدر يطالع خلود مستانس ويضحك عليه ...
التفت لقى نور قاعده تربط جوتيها ... راح وراها ....

بدر : ابي مره ايي اهني وما القاج
نور : (شهقت) خرعتني
بدر : اسف مو قصدي
نور : لا عادي شدعوه ... وين خلود ؟
بدر : اهناك مع خدامته ... اسميها صدفه ولا شنو ؟
نور : ههه لا انا اهني كل يوم هالحزه امشي ... المشي اهني احلى من الممشى .. والهوا احلى
بدر : رطوبه ساعات وين الهوا احلى
نور : ههه هم ريحة البحر حلوه حتى لو رطوبه.... خل اروح اعض خلود
بدر : شبتسوين فيه ؟
نور : اعضه وارد

راحت نور صوب خلود وشالته وباسته وقعدت تحاجيه شوي وتضحك معاه وردت المكان الي كان واقف عنده بدر ...
نور : تيي تتمشى معاي بدال قعدتك اهني ؟
بدر : وخلود ؟
نور : معاه خدامته وجدامنا ماراح يصير فيه شي لا تحاتي
بدر : اممم يلا عيل مشينا .

البارت السادس عشر


راح بدر يم نور وبدو يمشون مع بعض ....
نور طالعت بدر وضحكت
بدر : اشفيج تضحكين ؟
نور : فجاه استوعبت اني ما اعرف اسمك وصارلي جم يوم لما اشوفك اسولف معاك
بدر : ههه اسمي بدر
نور : مو لايق عليك
بدر : هههههه الناس يقولون عاشت الاسامي
نور : ادري ... بس مابي اصير وايد رسميه .. وبعدين شكلك مو وايد تضحك قلت اضحكك شوي
بدر : منو قال انا ماضحك ؟
نور : مبين من عيونك... ليش شايل الدنيا كلها على راسك ؟ ترا ماكو شي يسوى
بدر : اممممم يمكن الي فيني يسوا
نور : وشنو الي فيك ؟ الحمدلله صحتك زينه وولدك معاك واهوه بعد بخير وبصحته وعافيته... الا ايده المكسوره طبعا بس بتطيب مع الايام
بدر : هههههه لا مو عن جذي
نور : ما تبي تقول ؟
بدر : مابي اعور راسج وماعتقد بتفهمين الي انا احس فيه
نور : جرب .. شخسران
التفت بدر على خلود وقام يطالعه
نور : افهم انه الشي الي فيك له شغل بام خلود ؟
بدر : له شغل ؟ الا اهيه السالفه كلها
نور : شكثر صارلكم متطلقين ؟
بدر : جم شهر بس
نور : ما تشوفها ؟
بدر : لا ... كلش
نور : ولا حتى لما تاخذ خلود ؟
بدر : لا اروح اخذه من بيت امها ماتكون موجوده اهيه
نور : بيت امها ؟ ليش اهيه وين ساكنه
بدر : هههه عند ريلها اليديد
نور : تزوجت ؟!
بدر : اي
نور : مو توك تقول جم شهر بس من تطلقتو ؟
بدر : طلعت من العده وتزوجت على طول
نور : .......
بدر : اشفيج سكتي ؟ قاعده تفكرين بنفس الشي الي انا فكرت فيه اول ما دريت انها تزوجت صح ؟
نور : انتو ليش تطلقتو ؟
بدر : بدون سبب ... يت قالتلي طلقني ... حاولت اقنعها تقعد بس ما رضت ... صممت عالطلاق .. وعطيتها الي تبيه ... وراحت تزوجت على طول جنها ما صدقت
نور : تحبها ؟
بدر : ام ولدي شلون ماحبها ؟
نور : امممم
بدر : بس لو اعرف اهيه عرفته واحنا متزوجين ولا عقب ... التفكير بيذبحني .... احس همي زاد من التفكير اكثر من لما طلقتها
نور : مو لازم تعرف
بدر : نعم ؟
نور : ههه لا صج ... مو ضروري تعرف ! من باعنا برخيص بتراب ينباع... ولا شرايك ؟
بدر : هههههه نور هذي ام ولدي لازم اعرف انا مخلي ولدي عند وحده كفو ولا لا
نور : ريلها يحب ولدك ؟
بدر : شكله جذي
نور : عيل ماكو شي تحاتيه... هذا اهم شي.. طلاقكم مو نهاية حياتك ... بالعكس هذي حياة يديده لازم تعيشها
بدر : اممم حسستيني انج كنتي متزوجه قبل
نور : هههه لا مو عن ... بس احب اطالع كل شي من الجانب المشرق
بدر : على جذي يعني انتي ماعندج شي ينكد عليج حياتج ؟
نور : الحمدلله على كل حال
بدر : انزين خل نغير الموضوع بعيد عن النكد ... ليش تيين اهني بروحج ؟
نور : انا وحيدة امي وابوي ... ماعندي اخت او اخو ايوون معاي اهني
بدر : ورفيجاتج ؟
نور : ما عندي رفيجات
بدر : كلش ؟
نور : مو كلش كلش عاد ههه .. عندي رفيجاتي بالدوام .. الي كنت اعرفهم قبل ايام الدراسه.. بس وحده قريبه مني حيل واطلع وارد معاها ماعندي ... او تقدر تقول ماحب
بدر : ليش ؟
نور : مادري .. وايد بنات عبالهم انا شايفه نفسي ومغروره.. عمري ما رافجتني وحده كانت تبي صج تكون رفيجتي ... كلهم يقربون مني يشوفون حياتي او لانهم يبون شي ..
بدر : امممم وقررتي تعيشين بالدنيا بروحج؟
نور : ههههه تقدر تقول جذي
بدر : جم ساعه تمشين اهني كل يوم ؟
نور : ساعتين ... من ال 4 لي ال6
بدر : شمعنى اخترتي هالوقت ؟
نور : الصبح بالدوام .. ارد البيت ابدل واتغدا ... وبعدين ايي اهني .. ولا متى تبيني ايي اتمشى ؟ بليل بروحي ؟
بدر : ههه اي صح


بعد نص ساعه بدر خذا خلود وراحو البيت ... وكملت نور مشي ..

بليل عند ياسمين...

كانت ياسمين منسدحه بغرفتها ودش عمر ...
عمر : اشفيج ؟
ياسمين : مافيني شي
عمر : شلون مافيج شي ويهج اصفر
ياسمين : تعبانه شوي
عمر : اوديج المستشفى ؟
ياسمين : لا ماله داعي
راح عمر قرب من ياسمين ... قامت ياسمين بسرعه راحت الحمام ترجع ...
نطرها عمر ترد.... اول ما دشت الغرفه
عمر : قومي لبسي بوديج المستشفى
ياسمين : مو لازم
عمر : شنو مولازم ؟ ويهج اصفر وترجعين
ياسمين : عادي ... من النساة
عمر : نساة ؟! انتي حامل ؟؟؟
ياسمين : اي .. رحت حللت امس
عمر : وليش ما قلتيلي
ياسمين : ليش انته بالبيت عشان اقولك ؟؟ وحتى اذا بالبيت لك خلق تكلمني ؟
عمر : مو عذر
ياسمين : لا عذر !! عشان تحس لما انت تكون مو موجود وما تسال وايد اشياء تصير !
عمر : شقصدج ؟
ياسمين : ولا شي ... بنام تعبانه
راحت ياسمين انسدحت عالفراش وتغطت ...
راح عمر يمها ولمها من ورا
عمر : انا اسف ....
ياسمين بدت تبجي ....
عمر : خلاص سووومه حياتي انتي اسف ... كنت لاهي مع امي
ياسمين التفتت عليه: وانا ما قلتلك طنش امك ! بس مو تكشت فيني جذي ... ما تدري عني كلش عمر !! بذمتك هذي حاله ؟ من الصبح لي الليل مادري عنك ! وحتى تلفون ماترد علي !!
عمر : اسف ( باس راسها )
سكتت ياسمين ما ردت عليه عطته ظهرها وغمضت
عمر انسدح يمها وتلها صوبه ...
ياسمين : عمر بنام تعبانه
عمر : تعالي نامي على صدري
ياسمين : عمر عفيه خلاص
عمر : ليلحين زعلانه
ياسمين : لا بس خلني انام
عمر : عيل تعالي ...
لمها حيل ونومها على صدره



بعد يومين ... ( يوم السبت )
ياسمين كانت قاعده تبدل هدومها بتطلع
عمر : وين رايحه ؟
ياسمين : اييب خلود من بيت امي .. اشفيك اليوم السبت
عمر : خليه عند امج شوي لا تروحين الحين
ياسمين : ليش ؟
عمر : امشي نتغدا ابيت اهلي
ياسمين سكتت طالعته شوي : ...... زين اوكي
عمر : ماتبين تروحين ؟
ياسمين : امبله.. بس دقيقه خل البس
عمر : يلا ناطرج تحت



لبست ياسمين بسرعه وعدلت شعرها ونزلت...
عمر : بتروحين جذي ؟
ياسمين : اي ليش ... مو حلو ؟
عمر : لا مو عن ... بس نخلص نروح السوق ... ابيج تشترين هدوم حق الحجاب
ياسمين : ها ؟
عمر : من قال ها سمع ...
مشى عمر وطلع .. راحت وراه ياسمين وما قالت شي ما كانت تبي تناجره....
وصلو بيت اهل عمر ...
امه عفست ويهها اول ما شافتها وسكتت ما قالت شي ...
سلمت عليها ياسمين : شلونج خالتي
ام عمر : كنت زينه
ابتسمت ياسمين وماردت....
نوره بترقع الموقف : يلا غدا ... انا ميته يوع
عمر : اي يلا



راحو كلهم تغدو ولما خلصو ردو قعدو بالصاله...
فجاه قامت ام عمر وقاعده تدور شي بين القنفات ....



عمر : شتدورين يما
ام عمر : عباتي .... وين عباتي .... انا كنت حاطتها اهني !! ( تاشر مكان ياسمين )
قامت ياسمين وقفت وتدور مكانها تتاكد انها مو يمها
ياسمين : خالتي ماكو شي
ام عمر : وين راحت عباتي يعني ؟
عمر : يمكن فوق يما بغرفتج
ام عمر : لا لا لا عباتي انا ما اصعدها فوق تعرفني انته كله اخليها اهني
نوره : وين راحت يعني ؟؟
ام عمر : مادري ... ( تخز ياسمين بطرف عينها ) حسبي الله عاللي باقت عباتي !!!

البارت السابع عشر

ام عمر : حسبي الله عاللي باقت عباتي

نوره وعمر وياسمين طالعو بعض مصدومين....
عمر : شنو ؟
ام عمر : مادري منو باق عباتي
نوره : يما الله يهداج شيبون بالعباة يبوقونها ؟ مو من ديانة الخدم عشان ياخذونها
ام عمر : انا ما قلت الخدم
عمر : منو عيل ؟
ام عمر : مادري ( تخز ياسمين )
ياسمين التفتت على عمر وضحكت وجنها تقوله بعيونها والله صج ؟
عمر طالعها شوي وبعدين رد لف ويهه : تلقينها انشالله ... ياسمين نمشي ؟
ياسمين : اي بس دقيقه بروح الحمام
عمر : اوكي يلا ناطرج ...
راحت ياسمين شوي وطلعت... شافها عمر طلعت قام وقف ....
عمر : يلا ؟
ياسمين : اي يلا ... وي عمر نسيت دبلتي ... روح انته الحين ايي وراك
عمر : يلا ناطرج بالسياره لا تطولين تاخرنا على خلود
ياسمين : اوكي دقيقه بس ...
راحت ياسمين بسرعه الحمام تاخذ الخاتم وعمر طلع ... وام عمر تخزها موعاجبها الموقف
خذت ياسمين الخاتم وطلعت ...




ام عمر : ماراح تتهنين وياه
ياسمين التفتت : هلا ؟
ام عمر : ولدي ... ماراح اخليج تتهنين وياه ... وبتشوفين يا ياسمين !! يا انا يا انتي !
ياسمين طالعت نوره : اشوفكم على خير
نوره : حياج الله

طلعت ياسمين متنرفزه وركبت السياره واهيه ساكته
عمر : اشفيج ؟
ياسمين : ولا شي
عمر : امي قالتلج شي ؟
ياسمين : لا
عمر : يلا نروح نشوف خلود ... ولهت عليه
ياسمين : اممم




مر شهر... كان عمر يحاول انه يقعد اكثر بالبيت مع ياسمين .. ولانها تتنسى كان يحاول قد ما يقدر ما يضايقها او ينكد عليها ....
بدر كانت حياته عادي ... دوام ونادي وبالويك اند خميس ويمعه ياخذ خلود البحر وكان يشوف نور اهناك ويقعد يسولف معاها وخلود يلعب مع الخدامه وبعدين يمشي ...




يوم من الايام بدر رايح ياخذ خلود من بيتهم ....
طلعتله ام ياسمين وبايدها خلود والخدامه وراها ومعاها الاغراض
بدر : ها عمتي شلونج ...
ام ياسمين : هلا بو خالد شلونك يما ؟
بدر : بخير الله يسلمج... ها خلود اذيت ماما عوده اليوم ؟
ام ياسمين : اليوم بس ؟ يومين عندي شايل البيت كله
بدر : ليش عندج ؟
ام ياسمين : ياسمين مخليته عندي لانها تعبانه
بدر : اشفيها ؟
ام ياسمين : لا مافيها شي بس تتنسى
بدر سكت شوي ... : اهيه حامل ؟
ام ياسمين : اي توها ...
بدر : امم يلا خلود نمشي ؟
خلود : ايي
ام ياسمين بتعطي خلود حق بدر بس بدر مسكه وحطه عالارض ومشى معاه لي السياره ...



بالسياره .....
خلود : بابا نلوح بحل ؟
بدر : لا بابا
خلود ؟ بابا ابي بحللل
بدر : مالي خلق اليوم باجر اوديك
راح خلود بيت اهله ... قط خلود اهناك واهوه طلع يحوس بالسياره...

كان متضايق وايد من الخبر الي سمعه... كان وده انه هالياهل ولده ... تذكر شكثر كان مشتاق انه يكون عنده ولد ثاني غير خلود ... تذكر كل شي بينه وبين ياسمين ... وتضايق اكثر ...



عقب ثلاث ساعات بدر دق على امه ....

ام بدر : هلا بدر
بدر : يما شلون خلود ؟
ام بدر : زين كاهو قاعد يلعب
بدر : انزين يما خلو عندكم اليوم ماني ياي اخذه
ام بدر : ليش ؟ اشفيك ؟
بدر : تعبان شوي راسي يعورني ...
ام بدر : خلاص تعال نام عندنا اليوم لا تروح بيتك ما عندك احد يدير باله عليك
بدر : لا يما اهناك اريحلي
ام بدر : على راحتك حبيبي ... لا تخليني احاتيك دق طمني
بدر : انشالله... مع السلامه
ام بدر : الله معاك



راح بدر الدوانيه عند ربعه ....

عبدالله ( رفيج بدر ) : هلااااااا بدر .. وينك من زمان ما ييت قعدت معانا
بدر : ماكو لاهي ..
عبدالله : فيك شي ؟!
بدر : متضايق شوي
عبدالله : اشفيك ؟
بدر : ماكو عبيد بس مابي اتحجى فكني
عبدالله : افا بدوور ... انا عبود ! قول اشفيك... سالفة عن اهلك ؟
بدر : عن ام خالد
عبدالله : بدر وبعدين ؟ مو طلقتها خلاص ؟
بدر : عبوود تدري اني احبها
عبدالله : تزوجت اهيه الحين على ذمة واحد غيرك
بدر : ولهان عليها عبيد حس فيني شوي ( يحط ايده على راسه )
عبدالله : تبي نطلع نتمشى ؟
بدر : لا مالي خلق شي .... عندك زقاير ؟
عبدالله : بدور من متى تدخن ؟
بدر : عبدالله بلا اساله ... عطني زقاره
عبدالله : لا ماني معطيك .... قوم قوم نتمشى
بدر : مابي اتمشى عبيد تعبان
عبدالله : زين عيل .. نام عندي اليوم
بدر : ههههه ليش انام عندك ؟
عبدالله : ولهان عليك
بدر : عبدالله اثقل هههه
عبدالله : اي جذي اضحك ... مو مساع
بدر : هههههه
عبدالله : ولدك وينه ؟
بدر : عند امي خليته .... مالي خلق اجابله اليوم حدي متنكد
عبدالله : خلاص عيل خلك اهني شوي ويوصلون الربع... ويصير لويه ويتعدل مزاجك
بدر : اوكي ....





قعد بدر بالدوانيه ليما صار الليل ونام عند عبدالله ....
ثاني يوم الصبح راح بيت اهله ... قعد مع خلود شوي يلعبه وبعدين قعد بالصاله مع امه

ام بدر : بدر اشفيك شصاير ؟
بدر : مافيني شي ... ليش ؟!
ام بدر : اول مره تخلي خلود عندي ...
بدر : عادي خل يستانس معاكم
ام بدر : بدر قول الصج ... شاللي مضايقك ؟
بدر : ياسمين حامل
ام بدر : شدراك ؟
بدر : امها قالتلي
ام بدر : الله يسهل عليها ... لا تتضايق حبيبي ... ما تبيني ادورلك مره ؟
بدر : لا يما مابي جم مره قايلج لا تبطلين هالموضوع...
ام بدر : لي متى بتقعد جذي يعني ؟
بدر : بس عاجبني الوضع جذي ...
ام بدر : مو تبي ياهل ؟
بدر : كنت ابي ... الحين اخاف الهى فيهم عن خلود ... او خلود يغار لانه ماراح يكون عندي الا بالعطله
ام بدر : وحياتك كلها بتخليها حق خلود ؟! مايصير جذي !
بدر : يما بس الله يخليج ... خلود باجر ايي اخذه واوديه عند امه
ام بدر : ماراح تاخذه اليوم بعد ؟
بدر : لا مالي خلق
ام بدر : الي يريحك




ثاني يوم .... راح بدر خذا خلود من بيت امه ووداه حق ام ياسمين

نزله عند الباب اهوه والخدامه ومشى على طول ....
ام ياسمين : هذا انتو ... ( تسال الخدامه )... وين بابا ؟
الخدامه : بابا راح
ام ياسمين : غريبه ما نزل يسلم ولا حتى دق قبل لايي .. خلاص اوكي روحي المطبخ وخلي خلود اهني ...



مرو اسبوعين ..
بدر حالته ما تغيرت ... ياخذ خلود من ام ياسمين ويوديه بيت امه .... وكل يوم يروح الدوانيه عشان يلهي نفسه ......

عند عمر ....

عمر كان قاعد عند امه ....
ام عمر : ومرتك وينها ؟
عمر : بالبيت تعبانه
ام عمر : اممممممم دلع
عمر : يما البنيه حامل
ام عمر : كلنا حملنا وولدنا بس مرتك تتدلع ... فوق الشهر كله بالفراش ؟ شدعوه عليها ... ولا عشان اول مره تحمل تبي تقص عليك .... وييي صج نسيت هذا مو اول حمل لها
عمر : استغفرالله ...
رن تلفون عمر ... شاف ياسمين الي داقه حطه سايلنت
ام عمر : هذي اهيه ؟
عمر : ايي
ام عمر : امممم
ردت دقت ياسمين وعمر حطه سايلنت بعد ...
ام عمر : ويي قطع اشفيها تحن ؟!
ردت دقت ياسمين مره ثالثه.... ورد عليها عمر
عمر : الووو...
ياسمين : عمر تعال بسرعه
عمر : عند اهلي انا
ياسمين : عمر بسرعه الله يخليك ..... انا قاعده انزف !

البارت الثامن عشر....




ياسمين : عمر بسرعه الله يخليك ..... انا قاعده انزف!!!
عمر : شنو ؟! يلا كاني ياي بسرعه
ياسمين : بسرعه عمر عفيه
عمر : يلا يلا باي ...



ام عمر : اشفيها هذي بعد ؟
عمر : قاعده تنزف
ام عمر لفت ويهها وما قالت شي
نوره : ايي معاك ؟
عمر : لا لا ... يلا باي



طلع عمر بسرعه...
ام عمر : حسبي الله عليها خرعت الولد لا يصير فيه شي بالطريج الحين
نوره : يما ! يقولج البنيه تنزف تقولين حسبي الله عليها بدال ما تدعيلها ؟؟؟؟
ام عمر : اوووو فكينا انتي ... انا اوريها ما اخليها تتهنى والله

راح عمر البيت لقى ياسمين ناطرته .. خذاها ووداها المستشفى على طول ...



بالمستشفى...

طلع الدكتور وراح حق عمر ...
عمر : خير دكتور ؟
دكتور : لا تطمن ما فيها شي ... بس لازم تقعد وما تتحرك كلش .. وحتى بالبيت لا تخلونها تصعد فوق... وحتى نفسيتها ... لحد يضايقها او يزعلها
عمر : يعني الجنين مافيه شي ؟
دكتور : لا الحمدلله... بس مثل ما وصيتك...
عمر : انشالله.. تطلع اليوم ؟
دكتور : لا باجر الصبح....



راح عمر حق ياسمين ...
ياسمين : عمووور
عمر : الحمدلله عالسلامه
ياسمين : الله يسلمك
عمر : شلونج الحين ؟
ياسمين : امممممم
عمر : يلا عيل اييلج باجر
ياسمين : بتخليني بروحي ؟
عمر : تعبان ابي انام
ياسمين : نام اهني
عمر : وين انام اهني ... نامي الحين وقبل لا تقعدين الصبح بتلقيني اهني ...
ياسمين : اوكي
عمر : يلا تبين شي ؟
ياسمين : لا سلامتك
عمر : الله يسلمج.. باي



طلع عمر وقعدت ياسمين تبجي .......

ثاني يوم الصبح راح عمر حق ياسمين طلعها ووداها البيت....
دشت ياسمين البيت كانت تبي تصعد غرفتها فوق ....

عمر : لا لا تعالي وين رايحه ؟
ياسمين : بصعد فوق ابي ارتاح
عمر : لا تعالي الدوانيه .. حطيت اثاث اهني والخدامه نزلت هدومج عشان تنامين اهني.... الدكتور قال لازم ما تتحركين ولا تصعدين فوق
ياسمين : وخلود وين ؟
عمر : خليته عند عمتي قلتلها انج بالمستشفى وقالت بتييلج بعد شوي
ياسمين : اوكي ...



دشت ياسمين الدوانيه وانسدحت وغمضت عيونها وقامت تبجي ....

عمر : سومه اشفيج ؟
ياسمين : مافيني شي
عمر : ليش تبجين حبيبي ؟ مافيج شي الحمدلله وحتى الياهل مافيه شي
ياسمين : خفت
عمر : من شنو خفتي حبيبي ؟
ياسمين ( تبجي ) : عمر خفت ادق عليك وانته ما ترد ... كنت بروحي ماعرفت شسوي
عمر : اسف حياتي ما اعيدها مره ثانيه.. اوكي ؟
ياسمين : اممم
عمر باس راسها : اخليج ترتاحين الحين
ياسمين : اوكي
عمر : اذا تبين شي دقي .. ولو شيصير لا تقومين سامعه ؟
ياسمين : اوكي
عمر : يلا باي ..
ياسمين : باي




العصر ...
بدر كانت ليلحين نفسيته تعبانه.... تذكر نور ... وراح البحر يدورها ....
سفط سيارته ونزل ... لقى نور واقفه قاعده تشرب ماي ... راح وراها

بدر : عافيه
نور نقزت وشرقت بالماي وقامت تكح
نور : هذا انته !!!!!!
بدر : الله الله ... هههه اشفيج ؟
نور : انته وين كنت ! اسبوعين مختفي !
بدر : كاني بعد ويني
نور : اوووو بدر عن العبط
بدر : اشفيج اشفيج معصبه (يضحك)
نور : لا تكلمني زعلانه انا
بدر : لا لا عاد كل شي ولا انتي تزعلين
نور : فيك شي ؟ خلود فيه شي ؟
بدر : لا الحمدلله مافينا شي
نور : عيل ليش اختفيت ؟
بدر : ماكو
نور : قول اشفيك.....
بدر : امشي ما عليج مني ... خنسولف ونضحك
نور : ماكو شي اسمه ما عليي منك يلا قول ..
بدر : امممممم ام خلود حامل
نور : وشاللي مضايقك ؟
بدر : مادري نور مادري غيري الموضوع
نور : بدر متى ناوي تنسى يعني ؟
بدر : ترا تونا متطلقين ما صارلنا سنه
نور : اوكي وراحت حق غيرك... لي متى بقعد اقنعك بهالشي يعني ؟
بدر : انزين غيري الموضوع ... شصار معاج انتي بهالاسبوعين ؟
نور : ماكو هذي انا ... وصايره اكره ارد البيت
بدر : ليش ؟
نور : امي وابوي مسافرين ... انا بالبيت بروحي
بدر : متى بيردون ؟
نور : لا مطولين هههه
بدر : شلون تنامين بالبيت بروحج ؟
نور : عادي مو اول مره......



قعدو نور وبدر يسولفون وما حسو بالوقت كلش ....
رن تلفون بدر وكان عبدالله رفيجه الي داق
بدر : هلا عبيد


عبدالله : ها وينك ؟
بدر : طالع.. ليش ؟
عبدالله : ماراح تيي الدوانيه اليوم ؟
بدر : جم الساعه الحين ؟
عبدالله : الحين الساعه 9
بدر : اووووله ( طالع نور ) مادري اشوف بعد شوي يمكن امركم
عبدالله : يلا ماشي باي


بدر : باي ....... الوقت طاف بسرعه
نور : ههه تصدق ما حسيت كلش ( وقفت )
بدر : ولا انا ... ( وقف ومشى معاها صوب سياييرهم )
نور : بتروح الدوانيه
بدر : مادري ... اوصلج اول وبعدين اشوف
نور : توصلني وين ؟
بدر : بيتكم بعد وين ... بسايرج ليما توصلين وبعدين امشي
نور : لا ماله داعي عادي اروح بروحي
بدر : شلون ماله الداعي الساعه 9 وشوي واهلج موهني ...
نور : بتقنعني خايف عليي ؟
بدر ( خزها ) : امشي بدون تحلطم لا بالتلفون
نور : هههه لا والله بدر ماله داعي لا تحاتي
بدر : وانا اقعد احاتي لي باجر العصر صح ؟
نور : افففف منك .... يعني بتسايرني لي البيت .. اذا شافك احد من الجيران ؟
بدر : بمشي على طول ماني واقف
نور : نفس الشي ... دشيت الفريج وطلعت على طول وكنت وراي
بدر : تدرين شلون ؟
نور : شلون ؟
بدر : ييبي ( خذا تلفونها وكتب رقمه ) .... مابي ادق على روحي منه ولا شي ... متى ما وصلتي البيت دزي مسج او دقي من اي تلفون حتى لو تلفون خدامتكم بس عالاقل ادري انج وصلتي ومافيج شي
نور ( ابتسمت ) : خلاص اوكي ... ممكن تروح بيتكم الحين ؟
بدر : ههه بروح الدوانيه... يلا اشوفج باجر
نور : باجر مو ويك اند
بدر : ادري .. بس بيي اتحرش فيج كل يوم ... تعودت على خبالج
نور : انا مو خبله !
بدر : هههههههه تونسين لما تعصبين
نور : امش امش
بدر : زين يلا باي



راح بدر الدوانيه ونور ردت بيتهم ....
دش بدر : السلام عليكم
الكل : وعليكم السلام
راح بدر قعد يم عبدالله
عبدالله : ها جنه النفسيه تعدلت ؟
بدر : امممم يعني

شوي جان يدق عليه رقم غريب !

البارت التاسع عشر ....

شاف بدر تلفونه ... قام طلع من الدوانيه
بدر : الوووو
نور : هاي بدر
بدر : ويعاي .. ما تعرفين تسلمين مثل الناس ؟
نور : وااااااااااااي مليق مليق
بدر : هههههه اتغشمر معاج .... وصلتي ؟
نور : اي توني
بدر : قفلتي باب البيت ؟
نور : اي ...
بدر : وباب غرفتج ؟
نور : باب غرفتي شحقه بعد ؟ قفلت باب البيت وماكو احد بالبيت عشان يدش
بدر : قومي قفليه وانتي ساكته
نور : انزين انزين اففففف
بدر : ها قفلتيه ؟؟
نور : ايي... يلا رد حق ربعك
بدر : هه اوكي يلا تصبحين على خير
نور : وانته من اهله.. باي
بدر : باي



دش بدر الدوانيه مره ثانيه ...
عبدالله : من متى عندنا هالسوالف ؟
بدر : اي سوالف بعد ؟؟
عبدالله : يرن تلفونك وتطلع بره عشان تتحجى
بدر : هههه تفكيرك مو شي .. ماكو شي لا تحاتي
عبدالله : يعني مو حب يديد ؟
بدر : لا يبا مشكور مابي ههههههه




ثاني يوم الصبح...
الساعه كانت 7 ونص الصبح....
بدر كان متاخر على الدوام لبس بسرعه وتوه بيطلع ... رن تلفونه ... لقاه رقم نور...

بدر : الووو
نور ( بصوت واطي ) : بدرررر
بدر : اشفيج ؟!
نور : في صوت بالبيت
بدر : عندج بالبيت ؟ منو موجود غيرج ؟
نور : محد .... في احد قاعد يحوس بالبيت
بدر : يمكن الخدامه
نور : ما عندنا خدامه ... توني طليت من الدريشه ماكو سياره بره بعد ...
بدر : باب غرفتج مقفول ؟
نور : اي.... بدر حدي خايفه وماعندي احد ادق عليه
بدر : ماكو احد من اهلج ؟ خالج عمج ؟
نور : ما عندي عمام .. وخالي مسافر يعالج ومعاه عياله... وجيرانا كلهم راحو دواماتهم ماكو احد...
بدر : انزين خلج عالخط انا يايلج البيت الحين... ولا تحاولين تتحركين او تطلعين صوت سامعه ؟
نور : اوكي .. بدر بسرعه الله يخليك حدي خايفه
بدر : كاني طالع لا تحاتين ...




ياسمين قاعده عالفراش وتطالع تلفزيون... يالها عمر
عمر: صباح الخير
ياسمين : صباح النور
عمر : شلونج ؟ تعبانه ؟
ياسمين : لا عادي مافيني شي
عمر : اممم



عمر قرب من ياسمين ....
ياسمين : لا لا عمر عفيه قوم
عمر : اشفيج ؟
ياسمين : اتنسى ... ولا ناسي ؟ وغير جذي الدكتور قال مايصير !!
عمر : لي متى يعني ؟
ياسمين : مادري عمر قوووم جبدي قامت تقلب

قام عمر معصب وطلع من البيت...



بدر بالطريج ومعاه نور عالخط....
نور : بدر جنه طلعو ماكو صوت
بدر : نووور قعدي مكانج لا تطلعين
نور : اي بس ماكو صوت
بدر : قعدي اقولج لا تتحركين !!!!!! كاني دشيت منطقتكم وين اروح الحين ؟
نور : دش اول لفه يمين كمل ليما يلف فيك الشارع ... بعدين يمين بيمين
بدر : اي بيت فيهم ؟؟
نور : البيج...
بدر : اوكي لحظه .... كاني وصلت



نزل بدر من السياره... راح حق باب البيت الي جدام ....
بدر : نور الباب مقفول ... خل اشوف الباب الثاني
نور : اوكي ...
راح بدر حق الباب الثاني ...



بدر : هذا مبطل ...
نور : شلون مبطل ؟ انا قفلته امس
بدر : الدريشه مكسوره يمكن دشو منها ولما بغو يطلعون طلعو من الباب
نور : اوكي بدر لا تجيس شي ...
بدر : ادري ادري لا تحاتين ما لمست شي ... ترا الحين بدش البيت اوكي ؟ اتاكد ماكو احد
نور : اوكي ...



دش بدر ... قعد يلف البيت يدور اذا كان في احد ... ما لقى احد تحت ... صعد فوق ...

بدر : ترا انا قاعد مو تسمعين صوت وتخافين
نور : ههه اوكي
بدر : اول غرفه عاليمين غرفة منو ؟
نور : امي وابوي ليش ؟
بدر : مبطله... لحظه بدش .... نور مبطلين الكبت ومنبشينه... وايد اغراض طايحه بس ماكو احد اهني ..
نور : شنو ناقص ؟؟؟؟؟؟
بدر : نور شدراني انا حافظ اغراضكم ؟؟
نور : اوووو بدر مخترعه مو قصدي
بدر : ههه انزين .. بس باجي الغرف مسكره... خل اتاكد ماكو احد فوق واطلع
نور : اوكي




صعد بدر فوق تاكد ماكو احد ونزل ...
بدر : يلا انا نازل ...
نور : اطلع ؟
بدر : لحظه خل اطلع من البيت وبعدين طلعي من الغرفه جيكي عالبيت شوفي اذا ناقص شي
نور : اوكي ...

طلع بدر من البيت...
وطلعت نور من غرفتها وقعدت تشوف اغراض البيت وتدور اذا ناقص شي ...
بدر كان ليلحين عالخط معاها ....
نور : ماخذين التلفزيون الي بالصاله وساعة امي ... وال دي في دي بليير
بدر : بس ؟
نور : اي ... لانه باجي الاغراض مقفول عليهم ... وغرف البيت الباجي فاضيه مافيهم شي ومقفوله ...
بدر : زين اشوه
نور : يلا عيل روح دوامك انته وانا اروح المخفر
بدر : هههه وين وين ؟
نور : اشفيك ؟
بدر : بتروحين المخفر ؟
نور : اي ... اشفيك ؟
بدر : بروحج ؟
نور : اي ..!!
بدر : هههه هالبنيه مو صج.. قومي لبسي خلصيني ياي معاج انا
نور : لا مو لازم
بدر : مو لازم ويهج .. بتدشين المخفر بروحج ؟ خلصيني خلصيني
نور : ودوامك
بدر : ماكو دوام اليوم من وراج هههه خلصي لبسي .. ولو سمحتي يعني لبسي وسيع وطويل وربطي شعرج ولا تحطين مكياج
نور : كل هذا شحقه ؟
بدر : رايحه مكان كله رياييل بتروحين كاشخه يعني ؟
نور : هههه انزين يلا ابدل واطلع
بدر : يلا انا ماخذ فوق تحت راد انطرج بره عند البيت
نور : اوكي





رد بدر وقف عند بيت نور على ما لبست ونزلت
كانت لابسه توب طويل شوي وجينز سكيني ورافعه شعرها ولابسه نظاره كبيره شوي
شافها بدر ودق عليها ....

بدر : جذي يعني مو كاشخه ؟
نور : هذا اطول شي عندي
بدر : ههههه اااخ ياربي .. امشي بس امشي يلا انا جدامج

راحو المخفر وسجلو قضيه وبدر ما خله نور ولا دقيقه الا لما خلصو كل شي ...
بعد ساعه دق بدر على نور
نور : الووو
بدر : لا تنزلين تحت اوكي ؟
نور : ليش ؟
بدر : يايب واحد يسويلج الدريشه الي كسروها ويحط عليها حاجز عشان لحد يكسرها مره ثانيه
نور : اي بس ...
بدر : بس شنو بعد ؟ ناويه يدش احد ثاني ؟
نور : ههه خلاص اوكي





عمر راح يتغدا عند امه ....

ام عمر : هاا .. شلون مرتك ؟
عمر : زينه
ام عمر : خلصت نساتها ولا بعد ؟
عمر : لا ... وزايده بعد
ام عمر : زايده ؟؟ وي شهالعياره
عمر : شنو شهالعياره بعد تتنسى البنيه
ام عمر : كلنا تنسينا .... بس عاد ما طولنا هالكثر ولا نحشنا احد من البيت

عمر طالع امه وسكت...

ام عمر : اقول .. ليش ما تروح عند ولد خالتك ؟
عمر : منو ؟! عزوز ؟!
ام عمر : اي ... روح استانس ومن زمان ما شفته انته
عمر : اممم اروحله اليوم
ام عمر : دق عليه الحين شوفه وينه وروح
عمر : امممممممم لا لا بعدين...




عالساعه 6 المغرب...

دق عمر على ولد خالته....
عزيز : الووو هلا عمووور
عمر : هلا هلا عزيز شلونك ؟
عزيز : هلا بالقاطع ... وينك انته ؟
عمر : بالبيت
عزيز : تعال تعال بس عندنا
عمر : وينك انته صوت اغاني وازعاج ؟
عزيز : بالشاليه
عمر : لا خلاص عيل اشوفك وقت ثاني
عزيز : لا يلا عاد تعال ولهانين عليك والوضع حده مو طبيعي
عمر : اممم يلا اوكي الحين ياي

البارت العشرين

عزيز : لا يلا عاد تعال ولهانين عليك والوضع حده مو طبيعي
عمر : اممم يلا اوكي الحين ياي
عزيز : ناطرينك باي
عمر : باي



عمر راح الشاليه ونزل ... دش داخل .. لقى شباب وبنات... ورقص واغاني وموسيقى .. وطبعا شرب ....
عزيز : هلااااا عمر .... تو ما نور المكان ...
عمر : لا لا عزيز انا بطلع
عزيز : وين تطلع والله ماتطلع تعال اقعد شوي
عمر : عزوز تدري ماحب هالسوالف
عزيز : ما قلتلك سو شي انا ... تعال اقعد بس وطالع



راح عمر قعد يم عزيز ويطالع الوضع وماكان عاجبه ... بس ظل قاعد ..

الساعه كانت 11 بليل ... بدر توه داش البيت .... تذكر نور والي صار معاها الصبح دق عليها بسرعه ....
نور : الوو هلا بدر
بدر : شلونج ؟
نور : تمام انته شلونك
بدر : بخير ... انتي بالبيت ؟
نور : لا ... بيت ييرانا
بدر : بلا عبط
نور : ههه والله من صجي
بدر : بتنامين عندهم ؟
نور : اي اليوم دقيت على ابوي وقلتله الي صار ... واهوه دق على بو محمد يارنا وقاله خلوها تنام عندكم
بدر : وعياله ؟
نور : ما عنده الا ولد واحد وقاله ينام بره اليوم ... وانا الحين بغرفة بنتهم اهيه قاعده تتسبح الحين
بدر : انزين شقالو اهلج عن البوقه ؟
نور : عادي ما قالو شي بس باجر بيردون طيارتهم العصر
بدر : اي اوكي يلا عيل ماطول عليج بس كنت بتطمن
نور : ثانكيو بدر والله ماقصرت اليوم وقفتك معاي ماراح انساها
بدر : شهالحجي ؟ استحي على ويهج
نور : هههه ليش ؟
بدر : بس احنا اصدقاء ما بينا ثانكيو وسوالفج وخرابيطج هذي
نور : ههههه خلاص اوكي
بدر : هه يلا تصبحين على خير
نور : لحظه لحظه بدور
بدر : هلا ؟
نور : باجر خلود عندك صح ؟
بدر : اي.. بس اهلج بيردون باجر يعني ماراح تشوفينه
نور : امممم مو عذر تييبه عقب باجر !!
بدر : ههه خلاص اوكي يلا روحي نامي
نور : اوكي باي
بدر : باي...




الساعه 1 وعمر ليلحين بالشاليه عند عزيز.......
دقت ياسمين على عمر تشوفه وينه... عمر طالع تلفونه وحطه سايلنت

عزيز : اشفيك ما ترد ؟ مرتك ؟
عمر : ايي ...
عزيز : اشفيكم متهاوشين ؟
عمر : عادي
عزيز : شنو يعني عادي ؟
عمر : يعني هذي حالتنا صارلنا فتره... امي ماتبيها ووايد تحن ومرتي الحين تتنسى ومع سوالف امي صاير ماحب اقعد بالبيت... وامي من طاحت بالمستشفى واهيه تحن كل يوم لازم اروح اقعد عندها ولا تزعل
عزيز : يا معود شلك بسوالف الحريم ؟ اخذ اخذ وريح بالك
عمر : عزيز ....
عزيز : اخذ وانت ساكت .. صدقني ماراح تخسر شي
عمر خذا الكاس ... قعد يطالع ... وبدا يشرب.......



ياسمين حست بنغزه بقلبها ... ردت تدق ... مارد .....
قعدت ياسمين ساعه ... وردت دقت مره ثانيه ... هم مارد عليها ...

حطت راسها عالمخده وغفت واهيه تنطره ....

الساعه 3 ونص الفير دش عمر البيت .........

ياسمين صحت على صوت الباب ...
ياسمين ( بصوت عالي ) : عمممرررر .... عمررر
راحلها عمر ...
عمر : هلا ؟
ياسمين : وين كنت حبيبي قعدت احاتيك
عمر : مع ربعي
ياسمين : اشفيك جذي ؟ مو طبيعي
عمر : تعبان بنام ...
ياسمين : بس ....
مشى عمر وخلاها ورح غرفته فوق ينام .......
ياسمين : يارب الي فبالي مو صج يارب مو صج ....



مرو اسبوعين ......
بدر ماكان يكلم نور وايد بس كل يوم يشوفون بعض العصر عالبحر يتمشون ... وبالويك اند يكون خلود معاهم .....
عمر كل يوم يسهر مع عزيز ولد خالته ويشرب عالخفيف....

يوم من الايام دش عمر على ياسمين البيت الساعه كانت 12 ...
عمر : ها قاعده ؟!
ياسمين : اي .. اشفيك ؟
عمر : ليش ما تنامين فوق ؟
ياسمين : ماقدر اصعد اشفيك ؟
عمر : انا اصعدج قومي ...
ياسمين : مو لازم عادي تعودت انام اهني
عمر : لا لا امشي فوق احسن لاني بسهر اهني ويمكن ايوون ربعي
ياسمين : اوكي



راح عمر صوبها وشالها ... صعدها فوق ..... حطها عالفراش
عمر : تبين شي ؟
ياسمين : لا
عمر : خلاص نامي عيل
ياسمين : اوكي

نزل عمر بسرعه ... ياسمين كانت مستغربه منه ومن طريقته شلون يحاجيها وكان غصب الا يصعدها فوق ... سمعت ياسمين صوت باب البيت تبطل مره ثانيه .. قامت بتطل تشوف عمر طلع مره ثانيه ولا بيدخل احد

قامت بسرعه صوب الدريشه ... طلت ... لقت عمر رايح سيارته

بطل الباب ونزلت معاه بنيه .....
دخلها البيت....



ياسمين انصدمت ماتدري شتسوي ... طاحت عالارض وقامت تبجي ....
تعبت ومو عارفه شتسوي .. حاولت تشيل نفسها وتروح تنسدح عالفراش ماقدرت...
طاحت عالارض وغفت ......
عقب ثلاث ساعات ...
طلع عمر من البيت ورد عقب نص ساعه ....
دش الغرفه لقى ياسمين طايحه عالارض

عمر : ياسمين .... ياسميييييييييين
ياسمين : هممم
عمر : فيج شي ؟
ياسمين بطلت عيونها .. شافت عمر جدامها تذكرت الي شافته
دزته بعيد عنها ...
ياسمين : مافيني شي وخر
عمر : اشفيج ؟
ياسمين اشرتله انها تبي ترجع ... قومها عمر الحمام وقامت ياسمين ترجع وتبجي



عمر شافها بهالحاله قعد يمسح على راسها وظهرها ... وياسمين تزيد بجي
ما تدري شنو الي كانت تحس فيه بلحظتها ...
منصدمه من خيانة عمر ... منصدمه لانه تغير ... حست قلبها قاعد يتقطع لحظتها .. تحبه بس بنفس الوقت كارهته ... ودها توخره عنها وتقوله مابيك ... بس بنفس الوقت ودها تلمه وتقوله ليش سويت جذي وانته تدري اني احبك ...

عمر : خلاص ؟ اردج الغرفه
ياسمين : ارد بروحي
عمر : سوومه اشفيج حبيبي ؟
ياسمين : مافيني شي تعبانه بنام
عمر : اوديج المستشفى ؟
ياسمين : لا مابي



راحت ياسمين انسدحت عالفراش غطت ويهها وقامت تبجي بس تحاول ما تطلع صوت عشان عمر ما يسمع .....

مرت شهور ... عمر كان على نفس حالته ... كل يوم سهر وبنات وخرابيط.... بدر حياته عاديه ما تغير فيها شي ...... وياسمين كانت طول هالفتره نفسيتها تعبانه بس تحاول تتحاشى عمر وما تبي تواجهه ... او تقدرون تقولون ما تبي تنصدم بالواقع..

ولدت ياسمين ... ويابت ولد ... سموه ( حمد ) مثل ما كانو متفقين قبل....
عمر كان طاير من الفرحه وحده مستانس...
بالمستشفى .. عمر قاعد يطالع حمد حاطينه بالفراش يم ياسمين



ياسمين كانت عيونها على عمر ....
ياسمين : مستانس؟
عمر : اي اكيد مستانس ... واخيرا وصل حمد... تذكرين لما كنا نتهاوش شنسمي ولدنا العود؟
ياسمين ( ابتسمت ) : اي
عمر : انزين عيل باجر تطلعين من اهني صح ؟
ياسمين : اي ...
عمر : اي قبل لا انسى ... بس تطلعين من النفاس راح نسكن عند امي
ياسمين : شنو ؟! ليش ؟!
عمر : بس بعد عندج ياهل الحين لازم تجابلينه
ياسمين : اي عادي ... يوم يبت خلود كنت ابيت بروحي
عمر : انا اخاف على ولدي
ياسمين : وبدر ماكان يخاف على خلود ؟!
عمر : انا جم مره قلتلج لا تقارنين ؟!

البارت 21

ياسمين : مو قصدي اقارن بس ....
عمر : لا بس ولا شي انا قلت بنروح بيت اهلي
ياسمين : ........
عمر : سامعه ؟
ياسمين : اوكي


لفت ياسمين ويهها وعينها دمعت ... قعد يمها عمر وباس راسها

عمر : مو قصدي اصارخ عليج .. بس انتي تنرفزيني بكلامج وتخليني اصرخ غصب
ياسمين : اهيه لو راده عالصراخ بس جان صارت السالفه هينه ... بس مو على جذي اهيه
عمر : شتقصدين ؟
ياسمين : لا ولا شي سلامتك ....
عمر : انزين ناقصج شي اييبه معاي ؟؟
ياسمين : بتيي اهني باجر ؟
عمر : لا ماله داعي امج بتيي تاخذج من اهني .. انا امرج بليل
ياسمين : اوكي


ثاني يوم طلعت ياسمين من المستشفى .... وراحت بيت اهلها ...

بالبيت ..
ام ياسمين : عيل وين ريلج ما يا شافج ؟
ياسمين : مادري يمكن مشغول
ام ياسمين : دقي شوفيه
ياسمين : لا مو لازم عادي اذا فضى ايي بروحه
ام ياسمين : اممم على راحتج
ياسمين : يما وين خلود ؟ من رديت واهوه ماله حس
ام ياسمين : خلود ماخذته ساره السوق معاها وبتمشيه شوي
ياسمين : متى بترد ولهانه عليه ؟
ام ياسمين : ماراح يطولون تلقينها الحين بترد
ياسمين : اوكي



صار الليل ... وعمر ما مر ياسمين مثل ما قالها ...
دقت تشوفه وينه بس مارد عليها ....
ياسمين بقلبها " يا رب يتعدل ... يارب تكون هذي اخر مره "



صار ويك اند .... ويا بدر عشان ياخذ خلود...
توه سافط عند البيت ... ام ياسمين كانت توها بتطلع


بدر : عمتي شلونج ؟
ام ياسمين : هلا هلا بدر حياك دش داخل على ما ينزلون الخدامه توها قاعده تلبس خلود
بدر ( متردد ) : لا مو لازم انطرهم اهني
ام ياسمين : شدعوه بدر انته حسبة ولدي
بدر : ميخالف ... انطر اهني
ام ياسمين : خلاص خل اروح اقولهم يستعيلون
بدر : اي اوكي



دش بدر سيارته وحط راسه عالكشن وغمض عيونه...
رفع راسه ودق على نور
نور : الووو
بدر : الوو قوة
نور : اشفيك ؟ فيك شي ؟
بدر : ههههه اشفيج مخترعه ؟ مافيني شي
نور : مادري مو متعوده تدق علي اخترعت
بدر : لا عادي كنت بشوف وينج
نور : بالبيت قاعده ابدل الحين بروح البحر مثل كل يوم.. اشفيك اليوم ؟
بدر : متملل
نور : رايح تاخذ خلود صح ؟
بدر : اممم
نور : شفت امه ؟
بدر : لا
نور : يعني لي متى بيضيق خلقك على نفس السالفه ؟
بدر : مادري
نور : اوكي ذكرني بعد شوي لما اشوفك اعطيك كف
بدر : ههههههه شنو
نور : بطقك كف ... ويحوشك ارتجاج بالمخ ... او يمكن تفقد الذاكره.. المهم هالسالفه تنشال من بالك
بدر : هههههههههههههه هبله والله هبله
نور : هيييي انا مو هبله
بدر : زين يلا خلود طلع الحين نييلج
نور : اوووكي يلا باي
بدر : باي


ركب خلود السياره مع الخدامه ......

بدر : ها خلود نروح البحر ؟
خلود : ايييي نلوووووح
بدر : هههه اوكي
خلود : هيا بنااااا
بدر طالع خلود ضحك ومشى ....



وصل بدر البحر وكانت نور موجوده قاعده تنطرهم بسيارتها

نزل بدر وخلود نزلته الخدامه.. نزلت نور من سيارتها وراحت حق بدر
نور : يمين ولا يسار ؟
بدر : شنو اهوه ؟
نور : الكف ؟ اختار اي خد ؟
بدر : ههههه من صجج انتي
نور : اي عشان تتادب
بدر : خلاص تادبنا خلاص
نور : اكيد ؟
بدر : اكيد !
نور : وعد ؟!
بدر : وعد ولا تزعلين
نور : هههه اوكي



قعدو يتمشون ويسولفون...

بدر : شلون الدوام ؟
نور : عادي
بدر : ليلحين ما عندج رفيجات سنعين ؟
نور : ههه لا ومو محتاجتهم بعد
بدر : في احد مو محتاج ربع ؟
نور : اهمه شنو مهنتهم بالدنيا ؟ مو عشان نستانس معاهم واذا فينا شي يوقفون معانا ويسمعونا ونسمعهم اذا اهمه صار فيهم شي ؟
بدر : اييي
نور : خلاص مو لازم ... انته موجود وانته ( ماي فرند ) مو محتاجه بنات
بدر : اممممم يعني جذي
نور : ههه اي
بدر : انزيييين دام على قولتج الربع نستانس معاهم شرايج نلعب ؟
نور : شنلعب شكبرنا اثنينا ؟
بدر : الي يوصل حق خلود قبل
نور : اووله خلود بعيد
بدر : واحد اثنين ثلاث ( ركض )
نور : لحظه لحظه
بدر التفت ووقف ...
نور : قصيت عليك ( ركضت وركض وراها بدر )




عمر مر بيت اهل ياسمين بليل ....
عمر : ها شلونج ؟
ياسمين : والله زين تسال ..
عمر : بتبدين نكد ؟
ياسمين : انته شايف انا من متى طالعه من النفاس وانته توك تشرف ؟
عمر : مشغول
ياسمين : مشغول عن مرتك وولدك ؟ ما تقدر حتى تدز مسج عالاقل
عمر : استغفرالله ..... هاج مسكي
ياسمين : شنو هذا ؟
عمر : هديتج... ما بغيت ايي بدون لا اييبها
ياسمين بطلت الهديه الي يايبها .. لقت مفتاح سياره
ياسمين : هذا مفتاح سياره
عمر : اممم
ياسمين : بورش ؟
عمر : مو هذي الي كنتي تبينها ؟
ياسمين : اي
عمر : كاهي سافطه عند الباب ...
ياسمين : حياتي عمور مشكور ما قصرت..
عمر : شدعوه ولا شي هذي بالنسبه لقدرج عندي .. تدرين انج غاليه
ياسمين : حبيبي تسلم الله يخليك لي
عمر : اممم ترا شلت اغراضنا وديتهم بيت اهلي
ياسمين : كل شي ؟
عمر : اي
ياسمين : وخلود ؟
عمر : حاطيله غرفه لا تحاتين
ياسمين : اممممم اوكي



رن تلفون عمر ....
عمر : الوو هلا عزيز ... اي يلا اوكي .. باي
ياسمين : رايح ؟
عمر : اي عزيز بره ياي ياخذني ...
ياسمين : ليش ياي ياخذك ؟
عمر : اشفيك مو انا الي يايب سيارتج اهني ؟
ياسمين : اممم اوكي ... بيوديك البيت ؟
عمر : لا بروح اقعد عنده
ياسمين : .......
عمر : اشفيج ؟ فيج شي ؟
ياسمين : لا
عمر : يلا عيل مع السلامه
ياسمين : باي ...

طلع عمر وياسمين حطت راسها عالمخده تدعي وتحاتي .