أنصاف القباقب بالصلصة

أنصاف القباقب بالصلصة

أولا ترى ماكو مقادير و خلي عينج ميزانج
تاخذين أول شي القباقب و تفوحينها من 2 -3 دقايق بالماي و تضيفين عليه خل و بصل مقطع كبار و هيل عدل و بعدين تشيلينها و تتخلصين من الماي
ألحين يا محفوظة السلامة تكسرين العظاعظ و (كيفج تبين تحطينهم بالطبق ولا لأ ترى ما تفرق)
تشيلين الغطا و تكسرين القبقب نصين و تشيلين الخياشيم ( أشياء من فوق كأنها اسفنج )
و بعدين تغطسينهم ( القباقب ) بصلصة الصويا شوية و تصفينهم بصينية الفرن و تصبين عليهم الصلصة و تدخلينهم الفرن تقريبا 20 - 30 دقيقة و بالعافية

لا تخافون ما نسيت الصلصة :
مايونيز + معجون طماط + شوية خل و فلفل أسود و ثوم بودرة
الكمية على كيفج بالنسبة للقباقب و الصلصة . بس لا تصير الصلصة وايد ترى مو حلو تصير سباحة يعني ملعقة كبيرة صلصة لكل قطعة قبقب
و كمية المعجون تكون تقريبا ربع كمية المايونيز يعني 8 ملاعق مايونيز مقابلهم 2 -3 ملاعق معجون
و هكذا
بالعافية